Boks/ Furi mundi Çisorën, por i duhet të operojë bërrylin

Kampioni i botës në peshën e rëndë në boks, britaniku Tajson Furi, ka treguar se i duhet dy muaj për t’u rikuperuar një lëndim të bërrylit, e tha se mund t’i duhet edhe operim. Furi ka folur pas fitores që shënoi të shtunën mbrëma ndaj Derek Çisora me nokaut teknik në rundin e dhjetë, duke e mbrojtur titullin e botës në versionin WBC. “Duhet të bëjë disa gjëra. Kam disa probleme me duar, dhe ndoshta duhet të operohem në bërryl. Por, pas kësaj jam i gatshëm për këdo”, ka thënë Furi për “ESPN”. Furi pritet të ndeshet me Oleksandër Ushikun për unifikimin e gjithë titujve të mëdhenj të botës në peshën e rëndë. Ushik ka titujt WBA, IBF, WBO dhe WBO. Meçi mes tyre pritet të zhvillohet në Lindje të Mesme. Fillimisht ishte menduar të zhvillohej para marsit, porse lëndimi mund ta shtyjë sepse takimi nuk do të jetë i mundur të organizohet as gjatë Ramazanit (22 mars-21 prill).