Broja dhe Bajrami, sezonin tjetër mund të luajnë në të njëjtën skuadër të Serisë A

Lojtarët e Kombëtares nuk bënë një vit të mirë në aspektin e lojës e të rezultateve gjatë 2022-shit, por Edi Reja, që shpreson të rinovojë kontratën me FSHF-në dhe presidentin Armand Duka beson se ky kontigjent është në gjendje të kualifikohet në Europianin e vitit 2024 në Gjermani. Duhet thënë se ndër kuqezinjtë lojtarët më të kërkuar në treg janë Armand Broja dhe Nedim bajrami. Të dy janë pikasur nga klubet italiane dhe në merkaton e verës priten surpriza, por kjo nuk e përjashton mundësinë që surpriza të ketë që në merkaton e janarit. Mbetet të shihet se kush do të ofrojë më shumë, por për Brojën është i interesuar Milani, i cili a hyrë në bisedime me Çelsin, kurse për Bajramin ka shprehur interesim Interi, por edhe klube të tjera.

Broja sulmues me të ardhme

Milani ia di forcën Brojës prandaj edhe insiston që ta ketë në skuadër. Klubi kuqezi italian e sheh Brojën si pasues të Zlatan Ibrahimoviçit. Shtatlarti shqiptar mund të ketë të njëjtat tipare teknike e fizike sikurse dhe shtatlarti suedez. Broja ka pikasur në Premier League me Sauthemptonin ku ishte i huazuar sezonin e kaluar dhe shihet si mundësi, por ndoshta Milani e dëshiron si lojtar stoli fillimisht dhe kjo mund t’i prishë punë lojtarit për vazhdimësinë. Ndërsa Bajrami është afirmuar tashmë dhe për të ka pasur interesime të ndryshme. Por ai mbetet sidoqoftë një lojtar i Empolit derisa të vijë një ofertë e majme për klubin italian.

Lojtarët që luajnë në Itali

Për kuqezinjtë që luajnë në Itali ka folur trajneri i Kombëtares Edi Reja, në një nga të përditshmet sportive italiane gjatë ditëve që po përgatiteshin për duelin me Armeninë. “Ka shumë prej tyre. Është Gjimshiti, pastaj Kumbulla që është një djalë shumë i mirë, por fatkeqësisht nuk po gjen shumë hapësirë ??te Roma. Ismajli po rritet tek Empoli, një mbulues i madh. Sikur të ishte pak më i qetë në fazën e posedimit të topit mund të bëhej një futbollist i rëndësishëm, një lojtar i madh. Dhe pastaj Hysaj, Bajrami dhe Berisha, kapiteni ynë. Asllani? Ai duhet të luajë. Unë jam egoist në këtë rast, sepse flas si trajner i Shqipërisë. Shpresoj që ai dhe Kumbulla të huazohen në janar për të gjetur më shumë hapësirë. Ata nuk janë shumë të lumtur, por çfarë mund të bëjmë ne? Kanë kontratë me dy klube të mëdha. Duke thënë këtë, shpresoj se diçka mund të ndodhë, duke pasur parasysh moshën e tyre. Duhet të luajnë më shumë. Sa për Brojën mund të them që ai ka një potencial të madh, është një lojtar i strukturuar, 190 cm i gjatë, ka teknikë dhe shpejtësi të madhe, nuk e kap dot kur niset. Ka vetëm një fazë, që është posedimi i topit. Duhet të përmirësojë të dytën, sepse kur aksioni ka mbaruar, ndihmon pak. Nga ky këndvështrim, këtë vit ai po ecën pak më mirë, por sigurisht që nuk e ndihmon fakti që luan 20 ose maksimumi 30 minuta. Është e vërtetë, Napoli e kërkonte me ngulm. Xhiuntoli ishte i interesuar, e di që foli edhe me ne. Por ai synonte të qëndronte në Çelsi, një klub që më pas i rinovoi kontratën”, tha Reja, i cili edhe vetë nuk e ka të qartë të ardhmen e tij, pasi kontrata i skadon zyrtarisht ditën e nesërme, pra më 30 nëntor dhe në FSHF duhet të marrin një vendim për të ardhmen e tij.