Broja rikthehet në stërvitje, dëmtimi në Tiranë ndaj Italisë pa probleme

Përfaqësuesja luajti gjatë muajit nëntor disa ndeshje miqësore, por vetëm njërën arriti të fitonte, atë ndaj Armenisë në duelin e fundit në këtë seri përballjesh testuese. Praktikisht fitoi atë takim ku nuk ishte në fushë sulmuesi Armando Broja, i cili u dëmtua në një miqësore më herët, pikërisht atë me Italinë të humbur 3-1 në “Air Albania” në Tiranë. Dëmtimi i Brojës alarmoi jo vetëm stafin e Kombëtares, por edhe vetë klubin e Çelsit, i cili e mori menjëherë lojtarin pranë qendrës së saj mjekësore dhe e skanoi tërësisht. Ndërkohë, kur kanë kaluar gati tri javë nga ajo përballje, sulmuesi ka dhënë shenja pozitive të një rikthimi të shpejtë, pra ka shenja rikuperimi dhe ndihet optimist. Këtë e vënë në dukje edhe vetë mediat pranë klubit blu të Londrës që njoftojnë zbritjen e shqiptarit në stërvitje. Në fakt, skuadra e Çelsit është rikthyer dje për të zhvilluar seancën e parë stërvitore në Kobham, me një grup të përzier mes lojtarëve të U-21 dhe atyre që nuk luajnë në Kupën e Botës. Të tillë si, Zhorzhinjo, Armando Broja, Obamejang, Loftus-Çek apo Shalobah. Kështu, trajneri Graham Poter po përpiqet që të ndryshojë disi formën fizike të lojtarëve që ka në dispozicion pasi kanë kaluar disa ditë pushim. Ajo që ka qetësuar kampin blu dhe është pritur me entuziazëm është rikthimi i Brojës. Sulmuesi, i cili u lëndua gjatë ndeshjes miqësore që Shqipëria luajti me Italinë në mes të këtij muaji, por ai e ka kaluar këtë, dhe tani është kthyer me pjesën tjetër të shokëve të skuadrës, ndërsa përgatiten për fazën e tyre të ngrohtë përgatitore që do të zhvillohet në Abu Dabi. Broja është një lojtar premtues dhe prej tij pritet shumë në eliminatoret e ardhshme të Europianit të vitit 2024.