Cikalleshi gjen golin e radhës në Arabi, shenjë e mirë për Kombëtaren

Sokol Cikalleshi është një prej lojtarëve më efikasë të Kombëtares tonë që luajnë jashtë vendit. Pas suksesit disavjeçar në Turqi, me ekipe të ndryshme turke, tani ai gjendet në Arabinë Saudite, ku ka bërë paraqitje të mira dhe shënon rregullisht. Kavajasi pritet të ftohet nga trajneri Silvinjo për ndeshjet e radhës eliminatore të Kampionatit Europian dhe madje shihet edhe si një veteran që mund të bëjë lojën e duhur në repartin ofensiv, kjo dhe për faktin se nuk ka të tjerë më të mirë në formë sportive në këtë periudhë. Pra, e thënë ndryshe, Sokol Cikalleshi konfirmohet në formë para ndeshjes me Poloninë. Sulmuesi kuqezi ka gjetur sërish rrjetën në Arabinë Saudite, teksa këtë herë viktima e tij ka qenë Al Tare. Në minutën e 13-të, Cikalleshi i bëri presion mbrojtësit kundërshtar, duke e detyruar të gabojë dhe më pas, i vetëm me portierin, dërgoi topin në cepin e portës. Aktualisht sfida kryesohet nga Al Khalej me rezultatin 2-0, teksa sulmuesi kuqezi e nisi nga fillimi si titullar (ndeshja u mbyll 2-2). Ky ishte goli i 6 sezonal për Cikalleshin në Arabinë Saudite.

FIFA ndalon Ndoj të luajë për Greqinë, mbetet i Shqipërisë

Ndërkohë që Cikalleshi pritet të ftohet në Kombëtare e të ketë rol në formacion, një tjetër lojtar kuqezi po kalon peripeci në Greqi. Kështu, Andreas Ndoj nuk mund të debutojë me kombëtaren greke këtë muaj. Shqiptari me origjinë nga Shkodra u bë çështje pak kohë më parë, duke refuzuar ekipin përfaqësues shqiptar për të kaluar te fqinjët grekë, aty ku i duhet të presë ende për të luajtur, pasi nuk është grumbulluar nga trajneri Gustavo Pojet, për shkak të problemeve të dokumentacionit që FIFA ka nxjerrë për mbrojtësin, i cili luan për fanellën e Olimpiakosit, ashtu siç raporton edhe “gazeta.gr”. Disa muaj më parë, pasi luajti për Shqipërinë U-21, Ndoj refuzoi që të vazhdonte të përfaqësonte ngjyrat kuqezi dhe dëshira e tij ishte që të kalonte te Greqia. Pas këtij vendimi, lojtari nuk u komunikua më nga FSHF-ja dhe vazhdoi karrierën e tij. Por teksa pritej përfshirja në listën e kombëtares greke për ndeshjet e këtij muaji, FIFA nuk i ka dhënë dakordësinë ende për kalimin sërish te Greqia. Kjo për shkak se FIFA e lejon maksimumi dy herë ndryshimin e kombëtares, por për Andreas Ndojin kjo është hera e tretë që bën një kërkesë. Pasi u grumbullua nga ekipi U-17 i Shqipërisë, Ndoj kërkoi leje për të kaluar te Greqia U-17 dhe kjo gjë u aprovua nga FIFA, ndërkohë kërkesa e dytë ishte kalimi nga Greqia U-19 te Shqipëria U-21 gjatë vitit të kaluar, kërkesë që sërish u aprovua. Por, me ndryshimin e mendimit për përfaqësimin e Kombëtares që Ndoj bëri pak muaj më parë, gjatë këtij viti, 20-vjeçari kërkoi sërish leje për të luajtur për Greqinë dhe kjo është kërkesa e tretë, ndërkohë që FIFA e lejon dy herë. Mirëpo, siç duket, çështja në lidhje me letrat e nevojshme që ai duhet të ketë për t’u regjistruar dhe luajtur me grekët nuk është zgjidhur. Ende mbetet e paqartë se çfarë do të ndodhë me mbrojtësin, por ajo që dihet e sigurt është se këtë muaj ai nuk do të zbresë në fushë me kombëtaren greke.