Cungu “viktima” e radhës nga pankinat e Superiores, rrezikojnë teknikët e Bylisit dhe Apolonisë

Kategoria Superiore ka marrë ritmin e duhur pas një ndërprerje të gjatë si pasojë e bojkotit të Ligës Profesioniste, që vonoi nisjen e aktivitetit me më shumë se një muaj, si pasojë e kërkesave të lëshuara ndaj qeverisë në formë ultimative e që në fakt nuk u plotësuan. Sidoqoftë, tani vëmendja është e gjitha në kampionat, ku klubet shpresojnë të kapin ritmin e duhur dhe të përmbushin objektivat e tyre. Ka një paradoks, në dukje, ku skuadrat që cilësoheshin në fillim të edicionit si pretendente për të fituar titullin mbajnë vendet e fundit në tabelën e renditjes, kurse skuadra që cilësoheshin për mbijetesë kanë marrë kreun e klasifikimit. Kështu, Vllaznia dhe Kastrioti, dy skuadra që cilësoheshin për mbijetesë, janë në krye, pa asnjë humbje, kurse skuadra si Tirana dhe Kukësi, që cilësoheshin pretendentet kryesore për titull, po vuajnë nisjen e keqe dhe kanë shfaqur shenja krize në lojë e në rezultat. Gjithsesi, të gjithë përpiqen të fitojnë sa më shumë në këtë periudhë të vështirë pandemie. Por loja dhe rezultatet jo të mira të pretendentëve kanë dhënë verdiktet e para në pankina. Kështu, pas shkarkimit të trajnerit Emanuel Egbo nga Tirana pak ditë më parë, dje ishte radha e Armando Cungut të largohej edhe zyrtarisht nga Laçi. Ishin rezultatet që e penalizuan teknikun Cungu, i cili njihet si një nga teknikët e rinj më të aftë në Superiore, një zbatues i përpiktë i lojës mbrojtëse e kundërsulmuese dhe njohës shumë i mirë i kampionatit tonë. Por kjo nuk mjafton për presidentët e Superiores, të cilët janë të etur për sukses të shpejtë dhe shfaqen të paduruar për të arritur suksesin menjëherë. Çudi, por trajneri që e ndërtoi këtë Laç efikas dhe me një grup të mirë e të qëndrueshëm, Cungu, largohet, kështu që kurbinasit duhet të bëjnë zgjedhje të shpejtë për pankinën.

Situata që çoi në shkarkimin e trajnerit të Laçit

S’kishte si të ndodhte ndryshe. Mbyllet me një fund të hidhur aventura e dytë e Armando Cungut në stolin e Laçit. Pas më shumë se një viti në krye të skuadrës kurbinase, trajneri shkodran dhe klubi bardhezi kanë ndarë udhët për shkak të rezultateve të dobëta. Humbja ndaj Kukësit në javën e 4-t të kampionat i ka vendosur “kapak” bashkëpunimit mes palëve me Cungun që ka arritur akordin me presidentin Pashk Laska për të prishur me konsensus kontratën. Vetëm 3 pikë të grumbulluara në 4 javë, ishin shumë pak për një skuadër që pretendon titullin në këtë sezon dhe ka zhvilluar një merkato cilësore. Ka qenë vetë Cungu që ka konfirmuar lamtumirën e tij nga Laçi. Shkodrani lë skuadrën kurbinase pas më shumë se një viti me një rekord prej 38 ndeshjesh, 21 fitoresh, 7 barazimesh dhe 10 humbjesh dhe kualifikimit në Europa League e kalimit të një turi. Cungu u vendos në krye të ekipit kurbinas tetorin e viti të shkuar, ku zëvendësoi Sulejman Starovën.

Trajnerët e Bylisit dhe të Apolonisë në “fije të perit”

Përveç Egbosë dhe Cungut, lista e “viktimave” të bankinave të Superiores mund të shtohet me emra të rinj duke nisur që nga kjo fundjavë. Në Ballsh dhe në Fier janë të pakënaqur me ecurinë e skuadrave, kështu që trajnerët janë në shënjestër. Tekniku i Apolonisë, Xhovani Kolela, skuadra e të cilit ndodhet në vend të fundit të renditjes me vetëm 2 pikë, duhet të reflektojë bashkë me grupin, në të kundërt rrezikon shkarkimin. Situata nuk është aspak e mirë për fierakët që humbën në mesjavë ndaj Partizanit 0-3. Nga ana tjetër, edhe trajneri i Bylisit, Dovedan, është në “fije të perit”. Në Ballsh kishin pretendime para se të niste sezoni, ngaqë u bënë shumë lëvizje në merkato. Madje ballshiotët ishin mprehur për rivalitet për trofe, prandaj rezultatet e tanishme nuk bindin drejtuesit. Në këtë kuadër, Bylisit i duhet të fitojë për të evituar “ndëshkimet” që mund të pasojnë ndaj skuadrës dhe sidomos trajnerit.