Deklarata spektakolare e Daliç: Brazili duhet të ketë frikë nga Kroacia

Brazili dhe Kroacia do të përballen sot në orën 16:00 midis tyre, në ndeshjen e parë çerekfinale të këtij Botërori dhe nga ku do të mësohet edhe gjysmëfinalisti i parë i “Katar-2022”. Kroatët kaluan me vështirësi në fazën e 1/8 të finales përballë Japonisë, pikërisht pas kohës shtesë, por Brazili kaloi me lehtësi Korenë e Jugut, duke bërë festival golash dhe duke u dëshmuar si një prej skuadrave pretendente për trofeun. Por a do të mund Brazili ta kalojë Kroacinë në këtë raund? Këtë pikëpyetje analistët e interpretojnë në mënyra të ndryshme, kuptohet, duke bërë Brazilin favorit. Por për kroatët nuk kanë vlerë fare çfarë thonë bastet, analistët e specialistët. Për ta Brazili është skuadër që mundet dhe ata do ta dëshmojnë në fushë se dinë të fitojnë dhe ta eliminojnë nga kompeticioni njërin prej pretendentëve kryesorë sikurse është Brazili i trajnerit Tite. Ka qenë vetë trajneri kroat Zlatko Daliç që ka siguruar se skuadra e tij do të bëjë maksimumin në fushë dhe do ta surprizojë Brazilin. Madje tekniku kroat mendon se Brazili duhet ta ketë frikë Kroacinë, për lojën dhe nivelin e performancës që ajo bën në kompeticione të tilla. “Brazili është favorit. Ata kanë vetëbesim, entuziazëm, lojtarë cilësorë dhe gjithashtu kanë rikthyer Nejmar”, kështu e nisi konferencën për mediet në prag të ndeshjes çerekfinale të Kupës së Botës ‘Katar 2022”, trajneri i Kroacisë, Zlatko Daliç. Më tej ai theksoi se pavarësisht nivelit që brazilianët kanë si ekip, djemtë e Kroacisë kanë për t’ja vështirësuar shumë punën. “Në çdo rast ne mund t’u bëjmë atyre një ndeshje të vështirë. Unë nuk mendoj se presioni i vazhdueshëm ndaj tyre është shumë i zgjuar, por as nuk duhet t’u japim atyre shumë hapësirë. Ne do të përpiqemi t’i kontrollojmë me mençuri. Shanset nuk janë saktësisht 50%, por ne nuk arritëm në këtë pikë të turneut pa e merituar”, deklaroi Daliç. Është fare e qartë tashmë se dueli i sotëm pasdite midis Brazilit dhe Kroacisë do të jetë shumë i vështirë për të dy ekipet. Pavarësisht se brazilianët shihen favoritë për të shkuar në gjysmëfinale, kroatët do t’i luajnë të gjitha kartat e tyre dhe do të tentojnë maksimumin për të qenë ata në gjysmëfinale. Stili i lojës që aplikojnë është i ndryshëm, ndaj dhe Daliç këshillon që Brazili duhet të frikësohet nga Kroacia. Kjo e fundit bën futboll fizik me disiplinim taktik, kurse Brazili bën lojë teknike të bazuar në kualitetin e individëve. Do të fitojë grupi i Kroacisë apo talentet e Brazilit? Kjo mbetet të shihet sot në fushën e lojës.