Dinamo bën goditjen e madhe në merkato me Rexhinaldon, por i sjell “dhimbje koke” dëmtimi i Isaeskit

Sulmuesi i spikatur që ka luajtur më herët në kampionatin tonë, ish-sulmuesi i Kukësit, Rexhinaldo (Artur Rexhinaldo Faife), do të rikthehet në kampionatin shqiptar, madje ka vendosur edhe cilën bluzë do të veshë. Ai është bërë pjesë e Dinamos dhe sipas asaj ë shkruajnë mediumet sportive online, do të firmosë një kontratë 1.5 vjet. Natyrisht, ky është një moment kulminant i merkatos së “nëndetëses” dinamovitë, pasi nga cilësia e blerjeve të kësaj periudhe do të varet edhe ecuria e skuadrës dhe pritshmëritë e grupit në pjesën e dytë të sezonit. Praktikisht, Dinamo ka bërë lëvizje të shumta, por këtë gjë e kishte bërë ajo edhe në verë por afrimet s’ishin aq cilësore. Këtë herë ka afruar emra të spikatur si Lilaj e ndonjë tjetër e së fundmi edhe Rexhinaldon, kështu që duhet të punojë fort për një vend në kupat e Europës.

Rexhinaldo, njohje e vjetër në Superiore

Rexhinaldo e njeh mentalitetin e futbollit tonë dhe e njeh cilësinë e garës. Ai mund të shkëlqejë me Dinamon, për t’i dhënë një impuls “nëndetëses” të arrijë atë që nuk mundi ta bëjë në 15 xhirot e para të kampionatit. Po si ndodhi që Rexhinaldo u rikthye në futbollin shqiptar? Referuar medieve sportive, me sulmuesin ishte arritur akordi ditë më parë, por u vonua për shkak të procedurës së pajisjes më vizë, që zakonisht për ata që vijnë nga vendet afrikane zgjat më shumë. Të shtunën sulmuesi erdhi në Shqipëri dhe një ditë më pas zhvilloi seancën e parë stërvitore me kryeqytetasit. Referuar asaj që shkruan “Panorama Sport”, trajneri Bledi Shkëmbi dhe stafi i tij do të shohin gjendjen e 31-vjeçarit deri në ndeshjen e radhës me Kukësin, por gjasat janë që ai të mos e nisë si titullar. Siç dihet, Rexhinaldo është një lojtar i njohur për futbollin shqiptar, pasi më parë ka veshur fanellat e Luftëtarit, Kukësit dhe Laçit. Në Shqipëri rikthehet pas eksperiencave në Maqedoninë e Veriut dhe Kazakistan. Blutë shpresojnë shumë që me përvojën e tij sulmuesi afrikan të garantojë golat që i kanë munguar skuadrës deri në këtë pjesë të sezonit. Ndërkohë, një tjetër lajm i mirë për trajnerin Shkëmbi është se braziliani Denison Silva, nuk ka më asnjë pengesë dokumentacioni për të luajtur me Dinamon. Rexhinaldo ka marrë “OK”-ejin nga FIFA për t’u federuar me blutë dhe është gati për lojën që në ndeshjen e së mërkurës me Kukësin. Sikurse dihet, ai ka qenë herën e fundit në Kosovë, ku mbante veshur bluzën e Drenicës. Kujtojmë që Dinamo pret edhe një lojtar të huaj, që është kamerunasi Olivier Kingue.

Blutë humbasin Isaeskin, shkak dëmtimi

Ndeshja Dinamo-Kukësi luhet në “Elbasan Arena”, të mërkurën, ora 16:45. Takimi siç dihet ishte shtyrë për shkak të rasteve me koronavirus tek kuksianët. Përgatitjet për këtë sfidë kanë zgjatur prej shtyrjes së ndeshjes, por humori i bluve është prishur nga një dëmtim i Aleksandër Isaevskit. Mbrojtësi i majtë, titullar në formacionin e trajnerit Shkëmbi, ka dëmtuar gjurin dhe duket se e ka humbur ndeshjen me Kukësin. Sot dhe nesër stafi teknik do të shohë se cila do të jetë alternativa më e mirë, por mundësitë më të mëdha janë që atë ta zëvendësojë Ali Samake.