Dinamo gjen fitoren e parë në kampionat, Kukësi mbetet i fundit me zero pikë në 3 ndeshje

Java e tretë e Kategorisë Superiore startoi dje me dy duelet e para e do të vijojë sot me tri ndeshjet e tjera të saj, ndërkohë që dje pati një fitore me vlerë për Dinamo City e cila mundi Kukësin në atë që ishte cilësuar edhe si dueli i fundtabelës, pra një duel ku kërkohej fitorja për t'i ikur fundit dhe për të shmangur hijet e krizës. Dinamo ia del me një dygolësh të Prodanit, por me mjaft vështirësi, ndërkohë që në Rrogozhinë Egnatia fitoi me Erzenin dhe iu bashkua Skënderbeut në krye të renditjes. Në fakt, Egnatia e nisi shkëlqyeshëm ndeshjen me shumë gola që në pjesën e parë, por Erzeni në pjesën e dytë për pak ia përmbysi rezultatin. Gjithsesi, fituan rroogozhinasit 4-3.

Dinamo City gjen fitoren e parë

Një ndeshje shumë e veçantë u luajt dje në Elbasan, ndërmjet dy skuadrave që kishin startin më të dobët në këtë sezon e njëherësh kishin zhgënjyer me performancën e tyre, duke pasur shenja krize që në start. Por dje, Dinamo City arriti fitoren e parë në Superiore. Skuadra e Luigji Di Biaxhios triumfoi 2-1 në “frymën e fundit” kundër Kukësit në sfidën e javës së tretë të sezonit 2023/2024. Që u luajt në “Elbasan Arena”. Pjesa e parë nuk prodhoi asnjë gol, ndërkohë që fraksioni i dytë i takimit ishte tepër i luftuar. Indrit Prodani ishte heroi i 18 herë kampionëve të Shqipërisë. 25-vjeçari laçian realizoi dy golat e fitores për Dinamo City. Anësori i majtë zhbllokoi takimin në minutën e 53’, por verilindorët e Stavri Nicës barazuan rezultatin 13 minuta përpara fundit me anë të nigerianit Mustafa Gbolahan. Gjithsesi, Prodani dërgoi sërish topin në rrjetë në minutën e 11-të shtesë. Dinamo City gjen tri pikët e para në kampionat, teksa Kukësi mbyll renditjen me zero pikë.

U shënuan 7 gola në Rrogozhinë, Egnatia mposht Erzenin

Një "shportë" me gola pati dje në sfidën hapëse të javës së tretë të Kategorisë Superiore mes Egnatias dhe Erzenit të zhvilluar në Rrogozhinë. Vendësit fituan me rezultatin 4-3, duke lëshuar shumë në pjesën e dytë, me shijakasit që nga një disavantazh prej 3 golash brenda 22 minutash lojë, iu afruan barazimit në shtesë. Dëamena ishte thjesht i papërmbajtshëm në minutat e para, teksa e tundi fillimisht rrjetën në minutën e nëntë, duke zhbllokuar rezultatit, më pas realizoi edhe dy gola të tjerë (16’ dhe 22’), pasi Erzeni ende nuk e kishte marrë vetëm nga ndëshkimi i shpejtë. Në të 31-tën, Maliqi shkurtoi diferencën në 3-1, por Zejnullai ktheu shpejt epërsinë e tre golave (4-1) para se skuadrat të shkonin në dhomat e zhveshjes për pushimin mes pjesëve. Erzeni gjen forca për të reaguar në pjesën e dytë. Meçja në minutën e 54-t shkurtoi diferencën në 4-2, ndërsa në kohën shtesë, më konkretisht në 90+3’ Karhrimanovic realizoi të tretin për miqtë, duke e bërë më emocionuese sfidën në minutat e fundit. Megjithatë, nuk pati më ndryshim rezultati, kështu që Egnatia iu gëzua fitores së dytë radhazi. Ndërkohë, sot do të luhen ndeshjet e tjera të javës së tretë të Kategorisë Superiore, ku praktikisht janë duelet më të forta e të rëndësishme të javës. Tirana do të presë kryesuesit e garës, Skënderbeun, ndërkohë që në Shkodër, Vllaznia do të presë Partizanin.

Superiore, Java 3

Të mërkurën

Egnatia-Erzeni 4-3

Dinamo-Kukësi 2-1

Të enjten

Tirana-Skënderbeu 15:00

Laçi-Teuta 16:00

Vllaznia-Partizani 19:00

Renditja

Nr.Ekipi Pikë

1.Skënderbeu 6

2.Egnatia 6

3.Vllaznia 4

4.Tirana 4

5.Partizani 3

6.Dinamo 3

7.Erzeni 2

8.Teuta 1

9.Laçi 1

10.Kukësi 0