Disiplina masakron Tiranën, 90 ditë pa spektatorë, lojtarët nga 4 deri në 12 muaj pezullim

Ngjarjet radikale që ndodhën në stadiumin e Rrogozhinës në ndeshjen midis Tiranës dhe Bylisit, në kuadër të xhiros së 35-të të Superiores, ku tifozët bardheblu pushtuan fushën dhe synuan të rrahin arbitrat, por edhe përfshirja e lojtarëve në dhunë verbale e madje deri në tentativë për të goditur gjyqtarin Kridens Meta, kanë sjellë një penalitet të rëndë për Tiranën. Kjo ndodhi për shkak se gjyqtari dha një penallti disi të dyshimtë në minutën e 80-të të ndeshjes, gjë që solli barazimin 2-2 të lojës dhe të rezultatit final, për pasojë Tirana ra nga kryesimi dhe tani një javë para fundit të kampionatit Partizani është favorit absolut për të fituar titullin në Superiore. Por ngjarjet e dhunshme në Rrogozhinë kanë marrë përgjigje të fortë nga Komisioni i Disiplinës dhe Etikës në FSHF, ku për Tiranën ka penalitete mjaft të rënda, qoftë si klub, ashtu dhe për lojtarët e përfshirë. Nga disa ndeshje pezullim deri në dy vjet jashtë aktivitetit për disa lojtarë të Tiranës, tre muaj (përkohësisht) pa tifozë e sigurisht gjoba të majme.

Vendimet e Disiplinës dhe Etikës

Çeljen e hetimit disiplinor për aktet e ndodhura në ndeshjen e javës së 35-të të “Abissnet Superiore” midis KF Tirana dhe KF Bylis. Marrjen e masës së përkohshme të zhvillimit të ndeshjeve të KF Tirana pa spektator për një afat 90 (nëntëdhjetë) ditor në përputhje me Nenin 91 të KDS deri në marrjen e një sanksioni përfundimtar. Lojtari i KF Tirana, Visar Bekaj, për nxitje të urrejtjes dhe akteve të dhunës, në bazë të nenit 51/1 të KDS, dënohet me 12 (dymbëdhjetë) muaj pezullim nga të gjitha aktivitetet dhe gjobë në masën 100.000 (njëqind mijë) lekë. Lojtari i KF Tirana, Albano Aleksi, për sjellje josportive ndaj zyrtarëve të ndeshjes, në bazë të nenit 48/1/a të KDS, dënohet me 6 (gjashte) ndeshje pezullim nga të gjitha aktivitetet. Lojtari i KF Tirana, Aldi Gjumsi, për sjellje josportive ndaj zyrtarëve të ndeshjes, në bazë të nenit 48/1/a të KDS, dënohet me 6 (gjashtë) ndeshje pezullim nga të gjitha aktivitetet. Lojtari i KF Tirana, Bruno Lulaj, për sjellje josportive ndaj zyrtarëve të ndeshjes, në bazë të nenit 48/1/a të KDS, dënohet me 6 (gjashtë) ndeshje pezullim nga të gjitha aktivitetet. Lojtari i KF Tirana, Besir Iseni, për pështymjen ndaj zyrtarëve të ndeshjes, në bazë të nenit 48/1/c të KDS, dënohet me 24 (njëzet e katër) muaj pezullim nga të gjitha aktivitetet. Lojtari i KF Tirana, Florent Hasani, për sjellje josportive ndaj zyrtarëve të ndeshjes, në bazë të nenit 48/1/a të KDS, dënohet 4 (katër) ndeshje pezullim nga të gjitha aktivitetet. Zyrtari i KF Tirana, Arzen Vocaj, për sjellje josportive ndaj zyrtarëve të ndeshjes, në bazë të nenit 48/2/a të KDS, dënohet me 8 (tetë) ndeshje pezullim nga të gjitha aktivitetet. Zyrtari i KF Tirana, Kostandinos Jani, për sjellje josportive ndaj zyrtarëve të ndeshjes, në bazë të nenit 48/2/a të KDS, dënohet me 8 (tetë) ndeshje pezullim nga të gjitha aktivitetet. Zyrtari i KF Tirana, Marvi Kastrati, për sjellje josportive ndaj zyrtarëve të ndeshjes, në bazë të nenit 48/2/a të KDS, dënohet me 8 (tetë) ndeshje pezullim nga të gjitha aktivitetet.