E mbajtën “peng” brenda klubit, kroati akuzon Kukësin, kundërpërgjigjet klubi: Do e hedhim në gjyq për prishje imazhi

Një ngjarje e rëndë duket të ketë ndodhur me një klub të Kategorisë Superiore, pikërisht me Kukësin, ku ka pretendime se futbollisti kroat Ante Zivkoviç është kërcënuar të “mbyllë gojën” dhe të mos kërkojë paga të prapambetura e për këtë dyshohet se ai është mbajtur nën frikën e dhunës për disa orë në ambientet e klubit. Ngjarja e rëndë është pasqyruar në mediat kroate, por ende nuk ka informacion nga pala jonë, pasi Kukësi e mohon në mënyrë kategorike këtë, duke thënë se do ta hedhë lojtarin në gjyq për prishje imazhi. Por deri sa të dalë e vërteta, duket se skandali mbart emocione dhe nëse vërtetohet ajo që ka deklaruar futbollisti kroat Ante Zivkoviç, atëherë është një ngjarje që meriton ndërhyrjen e prokurorisë për hetime të mëtejshme.

Çfarë shkruajnë mediumet kroate?

Alarmin e kanë dhënë vetë mediat kroate. “Ish-futbollisti i Shibenikut, Dugopoljes dhe Umranijesporit, Ante Zivkoviç, i cili këtë verë ka nënshkruar kontratë me Kukësin, ka kaluar një dramë të vërtetë. Fatkeqësisht, siç ndodh shpesh te klubet e paqëndrueshme financiarisht, Zivkoviç nuk ka marrë disa pagesa dhe ka kërkuar një takim me drejtuesit e klubit për të rënë dakord për detyrimet e prapambetura. Mirëpo kur futbollisti 29-vjeçar shkoi në stadium, takimi u kthye në një tmerr të vërtetë. Zivkoviç u mbajt në stadium për disa orë me sharje dhe kërcënime.” Kështu shkruajnë mediet kroate, që i referohen qëndrimit zyrtar të Sindikatës së Futbollistëve Profesionistë të Bosnjë-Hercegovinës për atë që i ka ndodhur futbollistit ditët e fundit në Shqipëri. “Ante (Zivkoviç), pasi u sulmua fizikisht, arriti të largohej pas disa orësh nga stadiumi dhe të shkonte në Kroaci. Sindikata e Futbollistëve Profesionistë të Bosnjës dhe Hercegovinës vendosi ta ndajë me publikun historinë e tij dhe tashmë ka nisur procedurat në FIFA, për të vërtetuar veprimet e paligjshme të klubit shqiptar. Për momentin, nuk ka asnjë qëndrim nga klubi i Kukësit për këto akuza.

Reagimi i klubit të Kukësit

Kukësi ka reaguar dje me një komunikatë për shtyp nga faqja e tij. “Futboll Klub Kukësi hedh poshtë të gjitha akuzat e publikuara ditën e sotme në media nga futbollisti Ante Zivkoviç për kërcënime dhe dhunë nga ana e klubit! Sulmuesit Zivkoviç i është komunikuar nga klubi se nuk bën pjesë në planet e klubit dhe është thirrur për të mbyllur bashkëpunimin në përputhje me kontratën. Në këtë mënyrë, klubi i ka paguar futbollistit shumën e parashikuar në kontratë për mbylljen e bashkëpunimet. Për shkak se klubi e ka larguar futbollistin si të padëshiruar, Zivkoviç ka hedhur akuza të pabaza ndaj Kukësit duke tentuar të dëmtojë imazhin. Për deklaratat e dhëna dhe akuzat e hedhura, klubi i Kukësit do t’u drejtohet instancave më të larta për prishje imazhi. Për këtë, FK Kukësi ju garanton se gjithçka ka ndodhur është e faktuar me pamje filmike dhe provat do të vihen në shërbim të instancave përgjegjëse. Klubi i Kukësit ka qenë ndër vite një klub korrekt me futbollistët dhe jo vetëm e kurrë nuk mund të lejojë që një futbollist i larguar, të tentojë të prishë imazhin e klubit”, shkruan Kukësi në faqen e vet zyrtare.