Çelsi bën “paqe” me Mançester Junajtid, barazimi nxjerr fitues Mançester Sitin që i afrohet në kryesim

Në premier League angleze u luajt dje një prej ndeshjeve më të rëndësishme të kësaj jave, ajo mes Çelsit dhe Mançester Junajtid, e cila përfundoi në barazim 1-1, duke mos kënaqur asnjërën prej skuadrave në fushë, që pretendonin fitoren. Çelsi ndal kështu Junajtid në një barazim 1:1, pikërisht në ndeshjen e parë të Majkëll Karrik në stolin e dajave të kuq në Premierligë, i vendosur kryesisht nga një gabim trashanik dhe një penallti e Zhorzhinjos. Xhedon Sanço e kaloi Junajtid në epërsi herët në pjesën e dytë, para se Zhorzhinjo ta shpëtonte Çelsin nga humbja duke shënuar nga penalltia në “Stamford Bridge”. Megjithëse i lëshoi dy pikë, Çelsi mbetet lider i Premierligës tani me 30 pikë nga 13 ndeshje, por vetëm një më pak se kampioni në fuqi Mançester Siti dhe dy më pak se Liverpuli që e ndjekin nga pas. Mançester Junajtid, që u udhëhoq nga trajneri i përkohshëm Majkëll Carrik për herë të parë në ligë pas shkarkimit të Ole Gunar Solskjaerit, është tri ndeshje pa fitore në ligë tani. Ndërkohë, po në Premier League angleze, Mançester Siti triumfoi me rezultatin 2-1 ndaj Uest Hemit në “Etihad Stadium”, duke regjistruar fitoren e tretë radhazi në kampionat, që e ngjit përkohësisht në krye të renditjes, me 29 pikë, po aq sa ka edhe Çelsi, që do të përballet këtë pasdite me Man. Junajtid. Nën reshjet e dëborës, skuadra e Pep Guardiolës vuajti jo pak për të zhbllokuar ndeshjen dhe gjeti avantazhin në minutën e 33-të me anë të Ilkaj Gundogan, që konfirmohet sërish si bomberi i “citizens”. Në minutën e 90’ ishte mesfushori brazilian Fernandinjo që mbylli llogaritë e ndeshjes, duke shënuar edhe golin e dytë për Man. Sitin, ndërsa londinezët e Uest Hem shënuan golin e vetëm me Lanzinin, pak sekonda para vërshëllimës finale. Vlen të përmendet se Mançester Sitit i janë anuluar dy gola gjatë kësaj pasditeje, për pozicion jashtë loje, konkretisht të Mahrez në minutën e 17-të dhe Bernardo Silva në minutën e parë shtesë. Rikthehet te fitorja Leicester, që triumfoi me rezultatin 4-2 ndaj Uatfordit të Klaudio Ranierit. Madison ishte protagonist absolut në këtë takim, pasi shënoi golin e parë dhe asistoi dy të tjerët, të cilët u shënuan nga Xhimi Vardi, ndërsa goli i katërt pati për autor Lukman. Në sfidën tjetër këtë pasdite, Brentford mposhti Evertonin me rezultatin minimal 1-0, ndërsa përballja mes Bërnlit dhe Totenhemit nuk u luajt për shkak të reshjeve të dendura të dëborës, që kishin mbuluar fushën e blertë.