Emergjencë në Kombëtare, dëmtohet Ismajli por Silvinjoi e zëvendëson me Mihajn

Kombëtarja do të luajë më 27 mars në transfertë kundër Polonisë, në ndeshjen e parë e më të vështirën në kuadër të eliminatoreve të Kampionatit Europian të vitit 2024 që zhvillohet në Gjermani. Duhet thënë se përfaqësuesja ka ambicie kualifikimi, por ndodhet në një grup të vështirë. Sytë këtë herë janë tek stafi teknik, që ka ardhur i ri në krye të përfaqësueses tonë dhe bëhet fjalë për trajnerin brazilian Silvinjo dhe ndihmësit e tij. Trajneri do të ketë testin e parë në krye të kuqezinjve dhe ky test është zyrtar. I duhet të dalë me rezultat pozitiv, kështu që nuk pritet të ketë aventura. Por ka edhe probleme, që vijnë nga dëmtimet e shumta të disa lojtarëve titullarë, pra mungesa të rëndësishme që ndikojnë në performancë dhe në cilësi, rrjedhimisht edhe në rezultat.

Shqetësimet me mungesat e dëmtimet

Kombëtarja kuqezi do të nisë pasditen e së dielës grumbullimin para ndeshjes së parë në kualifikueset e Euro 2024 ndaj Polonisë, që luhet në transfertë më 27 mars. Trajneri Silvinjo ka shpallur që të premten listën me emrat e 23 lojtarëve që do të jenë të gatshëm për këtë premierë kuqezi. Ndërkohë, të shtunën braziliani doli në një konferencë për shtypin ku shpjegoi zgjedhjet e tij. Ai foli edhe për objektivat në këtë sfidë të parë. Departamenti i Komunikimit në FSHF, bën me dije se stafi mjekësor i Kombëtares ka qenë në kontakte të vazhdueshme me klubin e Empolit për të mësuar shkallën e dëmtimit të Adrian Ismajlit. Mbrojtësi kuqezi u dëmtua gjatë ndeshjes së fundit të Empolit në Serie A, ndaj Atalantës. Të shtunën i është nënshtruar analizave që kanë konfirmuar dëmtimin dhe është dalë në konkluzionin se ai nuk mund të jetë i gatshëm për ndeshjen e me Poloninë. Në këto kushte, Silvinjo ka vendosur të ndryshojë listën dhe të thërrasë mbrojtësin Enea Mihaj. 24-vjeçari që luan në Portugali me Famaliçao, do të jetë në dispozicion të skuadrës duke nisur nga e hëna.

Valon Ethemi protagonist me Istanbulsporin në superligën turke

Ndërsa Mihaj luan në kampionain portugez, në krahun tjetër të Europës, në Turqi, luan një tjetër futbollist kuqezi, Valon Ethemi, i cili vijon të bëjë paraqitje shumë të mira në Superligën e Turqisë. 25-vjeçari u bë protagonist në ndeshjen e fundit mes Istanbulspor dhe Beshiktash, por skuadra e tij u mund me shifrat 3-1. Tetovari shërbeu asistin e golit të vetëm për skuadrën e tij në transfertë. Në minutën e 70-të, Istanbulspori ngushtoi diferencën e golave, por në fund Beshiktashi shënoi dhe golin e tretë duke mbyllur gjithçka. Ky ishte asisti i katërt për Ethemin, i cili është dhe shënuesi më i mirë i skuadrës me 10 gola. Ish-sulmuesi i Kukësit po zhvillon sezonin e tij më të mirë, duke e ndihmuar Istanbulsporin për të shmangur rënien nga kategoria. Aktualisht, skuadra nga Stambolli ndodhet në vendin e 16-të me 24 pikë. Po aq sa dhe Sivasspori që pozicionohet në zonën e shpëtimit. Në ndeshjen ndaj Beshiktashit, Florian Loshaj luajti titullar, ndërsa u aktivizua në pjesën e dytë edhe Jetmir Topalli. Në këtë përballje nuk ishin të grumbulluar Eduart Rroca dhe Sindrit Guri. Ndërkohë në stol për 90 minuta ishte shqiptari tjetër,Valmir Veliu.