Erzeni gati për finalen, titullarin e shijakasve e duan në Turqi

Erzeni vijon përgatitjet për finalen e së dielës ndaj Korabit në orën 17:00 në stadiumin “Niko Dovana” të Durrësit. Skuadra shijakase do të ketë në dispozicion në këtë takim edhe portierin Dashamir Xhika, i cili mungoi në ndeshjen e fundit ndaj Tiranës për shkak kartonësh.

I vetmi në dyshim është mesfushori slloven, Marko Kriviçiç, i cili ka pasur probleme fizike dhe nuk luajti kundër bardhebluve të hënën. Gjithsesi, trajneri Alfred Deliallisi shpreson që të ketë grupin e plotë deri të dielën. Ndërkohë, gjatë këtij sezoni te shijakasit janë afirmuar shumë lojtarë dhe një prej atyre që ka shpërthyer është mesfushori kosovar, Adnard Mehmeti.

Së fundmi, mësohet se për shërbimet e 22- vjeçarit janë interesuar dy skuadra turke, pikërisht Hatajaspor dhe Alanjaspor. Në javën e ardhshme mund të ketë diçka konkrete për të ardhmen e kosovarit, që ka shkëlqyer në Superiore.