Erzeni “mbyt” Kukësin, Egnatia i merr pikë Teutës në Durrës

Java e 17-të u mbyll dje dhe prodhoi rezultate surprizuese në tërësinë e saj. Tashmë kampionati është pothuaj në mesin e tij dhe është ndarë grupi i skuadrave pretendente dhe atyre që do të luftojnë për mbijetesë. Këtë vit dy ekipe që më parë konsideroheshin pretendente, Kukësi e Teuta, bashkë me Bylisin, janë në fundin e tabelës dhe rrezikojnë rënien. Kështu, Kukësi vijon të vuajë në fund të renditjes së Kategorisë Superiore, ndërsa e ka mbyllur me disfatë takimin e raundit të 17-të. “Verilindorët” u mundën 0-2 nga Erzeni në “Kukës Arena”, duke mos mundur të bëjnë atë kthesën e shumëpritur, ndërkohë që shijakasit vijojnë të surprizojnë. Pjesa e parë e takimit vijoi me barazim pa gola deri në minutën e 45+2’, kur Alan Calbergue u dhuroi avantazhin miqve. Ndërsa në fraksionin e dytë Erzeni do të gjente sërish rrugën drejt rrjetës, këtë herë me Patrik Nonato që shënoi në minutën e 62-të. Pas këtij raundi Erzeni ngjitet në vend të katërt me 26 pikë, 2 pikë larg Vllaznisë së vendit të tretë, që përkon me vendin e fundit në renditje që shkon në kupat e Europës. Ndërsa Kukësi nga ana tjetër vuan në fund të renditjes, teksa deri në këtë javë ka grumbulluar gjithsej 16 pikë.

Hallaçi: Kukësi për mbijetesë, kush mendon ndryshe gabon

Rrahman Hallaçi mendon se te Kukësi duhet të kenë në mendje vetëm një gjë: mbijetesën. Trajneri i kuksianëve theksoi pas humbjes me Erzenin në shtëpi se skuadra po gabonte ndaj ishte në këtë situatë që tashmë bënte të qartë se verilindorët ishin kandidatë për të rënë nga kategoria. “Sigurisht në vështirësi kemi qenë dhe vazhdojmë të jemi, nuk dua të justifikoj asgjë. Kundërshtari e meritoi, e mori fitoren me meritë. Duhet të pranojmë situatën që jemi, duhet të gjejmë forca që të shpëtojmë skuadrën e Kukësit. Duhet të shohim gjërat me kujdes se situata sa vjen e vështirësohet. Por asnjëherë të dorëzohemi se duhet të gjejmë forcat për të shpëtuar skuadrën e Kukësit. Në këtë sezon, në mendjen time, duhet të gjejmë forca të shpëtojmë skuadrën e Kukësit. Nëse dikush flet për gjëra të tjera, është gabim. Janë lojtarë me eksperiencë, nuk mendoj se nuk e mbajnë presionin. Ne vuajmë për të shënuar para portës, edhe me Apoloninë kishim vështirësi për të shënuar gol. Jo më kot kishim folur që është e patolerueshme që Apolonia të na vërë në vështirësi. Ne kemi objektiva të tjera, është e vështirë ta pranonim që me Apoloninë. Por nuk mund të them që skuadra nuk luajti, por vendosen ato episode, raste që i shfrytëzoi shumë mirë kundërshtari”, tha Hallaçi.

Teuta s’di të fitojë, Egnatia i merr pikë në Durrës

Teuta-Egnatia mbyllin raundin e 17-të të Kategorisë Superiore, me dy skuadrat që janë ndarë me barazim 1-1. Pjesa e parë e këtij takimi u mbyll pa gola, ndonëse nga të dyja anët u tentua që të gjendej rruga drejt rrjetës. Ishin rrogozhinasit ata që zhbllokuan sfidën, duke realizuar në minutën e 51-të me Duamena, i cili i dha avantazhin miqve. Ndërkohë, në minutën e 70-të vendasit barazuan me Kallakun. Pas këtij takimi, Teuta renditet në vend të tetë me 18 pikë, teksa Egnatia rikthehet në vend të katërt me 26 pikë.

 

Ndeshjet, java 17

Të shtunën

Tirana-Bylis                 4-1

Vllaznia Laçi               4-1

Kastrioti-Partizani       1-1

Të dielën

Kukësi-Erzeni             0-2

Teuta-Egnatia              1-1

Renditja

1.Tirana           31

2.Partizani       30

3.Vllaznia        28

4.Erzeni           26

5.Egnatia         26

6.Laçi              20

7.Kastrioti       19

8.Teuta            18

9.Bylis             17

10.Kukësi        16