Esat Mala operohet, do t’i mungojë shumë kohë Vllaznisë

Problemet për Vllazninë nuk kanë të sosur dhe krahas fërkimeve të brendshme mes trajnerit e lojtarëve, një dëmtim ka shtuar më tej dozën e tensionit në kampin kuqeblu. Kështu, dëmtimi i Esat Malës ka tronditur jo pak ambientin te Vllaznia. Sulmuesi anësor nga Prizreni ishte padyshim nga më të mirët te kuqeblutë, por një rrëzim në minutat e fundit ndaj Partizanit, bëri që të dilte me ndihmën e barelës. Dy ditët e fundit është folur shumë në lidhje me dëmtimin e tij, teksa pasditen e sotme ka reaguar vetë klubi kuqeblu, duke dhënë më shumë detaje për rikuperimin. Vllaznia njofton se Mala theu klavikulën gjatë rrëzimit dhe iu desh t’i nënshtrohej një operacioni për rikuperimin. Sulmuesi anësor pritet të nisë aktivitetin e lehtë fizik vetëm në fund të muajit, teksa për rikuperimin e plotë do të duhen 6-8 javë. Thënë ndryshe, në rastin më të mirë, Mala do të jetë në fushë më 6 maj në transfertën ndaj Kastriotit dhe do të jap kontributin për tri sfidat e fundit të kampionatit. Me dëmtimin e Malës, shkodranët humbin jo pak në një fazë vendimtare të sezonit, megjithatë shpresat janë te Liridon Latifi, që duket se është rikuperuar plotësisht dhe është gati të zbresë në fushë.