“Fabrikat” më të mëdha të prodhimit të talenteve në botë, vendin e parë e ka një klub portugez

Futbolli gjithnjë e më shumë po bëhet komercial. Jo vetëm në aspektin e të drejtave televizive, nga ku sigurohen shumë të ardhura për kampionatet elitare dhe klubet e mëdha, por edhe në formën e reklamimeve, shitjes së fanellave, biletave etj. natyrisht, një vend të veçantë zënë ekipet e moshave, nga ku dalin talentet e reja dhe shitja e një talenti nxjerr fitime kolosale që i jep frymëmarrje klubit në vazhdimësi. Por a janë klubet më të mëdha më fitimprurëset në këtë drejtim? Padyshim që Reali i Madridit është një klub i madh që fiton shumë me ekipin e parë, por “Los Blancos” janë gjithashtu një klub që prodhojnë shumë lojtarë të rinj cilësorë që shiten apo huazohen më pas në treg. Flamengo, Barcelona dhe Atletiko Madridit nuk përfshihen fare në 10-shen e parë. Madje, në vendin e dhjetë ndodhet Liverpuli, që nxjerr nga shitja e të rinjve 171 mln euro. Para tij, në vendin e nëntë, renditen Sportingu i Lisbonës, që nxjerr nga shitja e talenteve plot 209 mln euro. Shitja rekord e këtij ekipi është Zhao Mario me 45 mln euro. Në vendin e 8-të renditet skuadra kampione e Europës, Çelsi. Londinezët kanë shpenzuar shumë në merkato, por gjithashtu “pa zhurmë” kanë përfituar plot 210 milionë euro, pas transferimeve si Abraham dhe Tomori. Një rritje të jashtëzakonshme ka pësuar akademia e Atalantës (vendi i shtatë). Italianët jo vetëm kanë dhuruar një futboll tërheqës në vitet e fundit, por bergamaskët kanë furnizuar kontinentin e vjetër me shumë talente, duke koleksionuar një fitim prej 211 mln euro. Në vendin e gjashtë renditet Bajer Leverkusen. “Aspirinat” kanë përfituar plot 213 mln euro pas transferimeve si Havertz dhe Kampl, ndërsa Leverkusen është përgatitur të shtojë fitimet këtë merkato me talentin Florian Virtz, 18-vjeçari i cili është në listën e shumë klubeve të mëdha në Europë. Lioni renditet në vendin e pestë me një fitim prej 270 mln euro, ndërsa në vendin e katërt renditet skuadra holandeze e Ajaksit, me 283 mln euro fitime. Vendin e tretë e mban Monako, me plot 285 mln euro fitime nga shitja e talenteve, ku rekordi historik është me Kilian Mbape 180 mln euro. Në vendin e dytë qëndron Reali i Madridit, me 330 mln euro fitime nga shitja e talenteve. Duket e habitshme, por vendin e parë si klubi me më shumë fitime nga talentet është Benfika, e cila ka siguruar nga shitjet e talenteve në 7 vjetët e fundit plot 379 mln euro. Nga këto, 120 mln euro i ka siguruar prej një talenti të vetëm, Zhao Feliks, që u ble nga Atletiko Madrid.