Futboll femra/ FSHF organizon ndeshjet e grupit 7 në Ligën B të Europianit

Futbolli i femrave në Shqipëri ka njohur një progres domethënës gjatë viteve të fundit, dëshmuar jo vetëm me rezultatet në përmirësim në ekipet kombëtare, por edhe me praninë e Vllaznisë në nivelin më të lartë për klube në Europë, pra në UEFA Champions League. Në këtë mënyrë, futbolli i femrave po jep shpresë për një ringritje të shpejtë dhe e vërteta është se UEFA nuk është kursyer për ta mbështetur futbollin e kësaj gjinie në Shqipëri, nëpërmjet projekteve të saj. Ndërkohë, shorti për disa ekipe kombëtare moshash për garat kualifikuese të Europianit është hedhur. Në këtë mënyrë, edhe Kombëtarja Shqiptare U-19 për vajza, njohu kundërshtaret e raundit të dytë të eliminatoreve të Kampionatit Europian për vajza 2023. Shorti e ka vendosur skuadrën e drejtuar nga Kreshnik Krepi në grupin B7 në Ligën B, aty ku përballë do të ketë Skocinë dhe Lihtenshtejnin. Ashtu sikurse ndeshjet e kualifikueseve të Kampionatit Europian për vajza U-17 që do të zhvillohen në Shqipëri, pas konsultimeve me federatat anëtare dhe UEFA-n, edhe sfidat e raundit të dytë të këtyre kualifikueseve do të zhvillohen në Shqipëri në datat 5, 8 dhe 11 prill në formën e një mini-turneu. Shqipëria e drejtuar nga trajneri Kreshnik Krepi është pjesë e Ligës B edhe për këtë vit, teksa do të garojë në ndeshjet e muajit prill për një vend të parë në grup, duke synuar ngjitjen në Ligën A për herë të parë. Në ndeshjet e raundit të parë për këtë grupmoshë që u zhvilluan në muajin tetor në vendin tonë, nën organizimin e suksesshëm të FSHF-së dhe UEFA-s, Shqipëria U-19 për vajza u rendit në vendin e dytë në grup, me dy fitore dhe një humbje. Duhet thënë se ambiciet e vajzave kuqezi këtë herë janë për më shumë dhe shpresohet të kemi sukses me kualifikim.