Goli i Jasir Asanit më i bukuri nga UEFA, Broja nuk është ende gati për Kombëtaren

Kombëtarja regjistroi në këtë shtator dy prej ndeshjeve më të bukura të saj në historinë e përfaqësimeve ndërkombëtare, duke barazuar fillimisht me Çekinë më 7 shtator në Pragë, dhe më 10 shtator fitoi 2-0 kundër Polonisë, një fitore që shijoi shumë tek tifozët e shumtë në mbarë vendin dhe në diasporë. Këto suksese e ngjitën Shqipërinë në vendin e parë në grupin E, me 10 pikë, e tanimë duhen matematikisht dhe 5 pikë nga tri ndeshjet e mbetura që Shqipëria të shkojë në Europianin “Gjermani-2024”. Por në fitoren e Polonisë, krahas entuziazmit të madh, një gjë u regjistrua si spektakolare, goli i Jasir Asanit, që u mor nga UEFA për kandidim me golat më të bukur të shënuar në këtë fazë të eliminatoreve. Goli i djaloshit nga Shkupi, që nisi si aksion nga krahu i djathtë, e që u gjuajt me të majtën në pozicion diagonal me portën, mori përmasa europiane. Topi pësoi një harkim të pabesueshëm dhe përfundoi në rrjetë duke mos i dhënë asnjë shans portierit Shezni. Dhe ky gol mori votat maksimale në anketim.

Votat në faqen e UEFA-s

Goli i Jasir Asanit në ndeshjen Shqipëri-Poloni, është përzgjedhur si goli më i bukur i raundit kualifikues në eliminatoret e Europianit. Në fakt, nuk kishte shumë dyshime se do të ishte ky gol, madje shumë tifozë komentojnë duke e konsideruar edhe golin më të bukur të kualifikueseve deri më tani. Me këtë gol të shënuar, Asani zhbllokoi sfidën në “Air Albania”, e më pas Daku vuloste fitoren e kuqezinjve me rezultatin 2-0. UEFA e ka publikuar si fitues tashmë golin e Asanit. Jasir Asani fiton për herë të dytë këtë çmim duke qenë se një gol të ngjashëm e ka shënuar edhe kundër Moldavisë. Fitues gjithashtu për çmimin si goli më i bukur, ka qenë edhe Kristjan Asllani, në fitoren ndaj Ishujve Faroe. Duhet thënë se Jasir Asanin e pikasi trajneri Silvinjo, duke i dhënë një detyrë në fushë krejt të kundërt me atë që mendonin trajnerët e tjerë para tij. ai është mëngjerash dhe duhet të luajë në të majtë, por Silvinjo e ka futur atë anësor të djathtë dhe në zbritje lojtari pozicionohet në ballore e gjuan me të majtën. Kjo e bën atë të ketë efikasitet shumë të lart në rol, gjë që e ka kapur mjaft mirë trajneri Silvinjo. Ky i fundit në këtë formë i ka gjetur pozicionin edhe Nedim Bajramit dhe lojtarëve të tjerë. Suksesi nuk është i rastësishëm, pasi ky trajner punon dhe jep siguri.

Poçetino jep sqarime për Brojën: Nuk është ende gati

Armando Broja nuk është ende gati për të zbritur në fushë. Pas dëmtimit të gjatë, sulmuesi i Kombëtares duhet të presë edhe pak ditë. Në Angli, i janë drejtuar pyetje Poçetinos në lidhje me Brojën, për të cilin vetë presidenti Armand Duka u shpreh se pritet të rikthehet shpejt në fushë. Trajneri i Çelsit, nuk i ka kursyer edhe notat e humorit në konferencë, duke pyetur edhe se kush është Federata Shqiptare. “Armando Broja, shefi i Federatës Shqiptare tha se do të jetë në stol të shtunën”, ishte pyetja e gazetarit. “Kush e tha këtë? Kush është Federata Shqiptare? Presidenti, trajneri? Nuk e kam dëgjuar. Ka respektin tim. Njoh Silvinjon dhe Zabaletën, trajnerët në Shqipëri dhe kam një marrëdhënie të mirë, por jo, jo ende, jo ende”, u shpreh Poçetino.