“Grushti i Hekurt”, Alban Beqiri syon të fitojë turneun ndërkombëtar të Tiranës

Alban Beqiri, kampion Ballkani në fuqi, zbret sërish në ring këtë të premte. 28-vjeçari do të jetë pjesë e “Grushtit të Hekurt” në një mbrëmje ku do të synojë të regjistrojë një tjetër sukses të madh. “Ky turne është një nga më të fortit në Shqipëri që bëhet për herë të parë, pasi do të vijnë kundërshtarë që pretendojnë për të fituar. Ndihem i motivuar, përgatitjet kanë qenë shumë të forta me trajnerin Sead Bushati, së bashku me kolegët që do të jenë gjithashtu në ring, Nelson Hysa, Alban Bermeta, Denis Nurja, Ajon Kaloshi etj. Ndeshjet do të jenë emocionuese, salla do të jetë plot. Uroj t’u bëj krenar. Deri më tani kam arritur suksese dhe shpresoj të mbaj këtë ritëm dhe të synojmë më të mirën, uroj më të mirën për të gjithë shokët e mi dhe të fitojmë e ti bëjmë të gjithë krenar”, tha ai për “Supersport”. Vasile Negara do të jetë kundërshtari i Beqirit. Rivali është një nga më të mirët në Moldavi, por pukjani jonë do të kërkojë triumfin me nokaut. “Kundërshtari vjen nga Moldavia. Është një nga më të mirët në boksin profesionist dhe olimpik. Është një kundërshtar mjaft i fortë, por me KO apo me pikë, duhet parë në ring. Në këtë punë, i pari është zoti, unë jam i dyti”, tha ai. Në karrierën e tij, 28-vjeçari nga Puka numëron 6 fitore në po kaq ndeshje si profesionist, ndërsa 5 prej tyre i ka arritur me KO. Ndaj, në sallën e lojërave “Feti Borova” ai i fton të gjithë që të jenë sa më të shumtë, për të përjetuar një mbrëmje ndryshe. “Dua që të gjithë të jenë prezent pasi do të shohin ndeshje boksi të forta, në një event që ndodh për herë të parë në Shqipëri”, shtoi ai. Beqiri është një prej boksierëve më të suksesshëm shqiptar, por ai tregon se nuk do të ndalet me kaq. “Në maj kemi përsëri kampionatin botëror, na presin lojërat olimpike. Është një vit i ngjeshur. Unë do jap maksimumin tim”, përfundoi Beqiri.