Hidhet shorti, përplasje titanësh në Europë, italianet kokë më kokë

Liga e Kampioneve pritet të dhurojë emocione dhe spektakël në fazën çerekfinale e gjysmëfinale të saj, pasi shorti dje përcaktoi duele sa interesante aq dhe të “dhimbshme” për dy skuadrat italiane, Milanin dhe Napolin. Kështu, ditën e djeshme u hodh në Nion të Zvicrës shorti që përcaktoi katër çiftet çerekfinaliste të këtij sezoni në Champions League. Reali i Madridit do të përballet me Çelsi, ndërsa goglat janë treguar të pamëshirshme duke vënë përballë Mançester Siti me Bajernin. Interi me fat, pasi gjen Benfikën, ndërsa Milani përplaset me Napolin. Pra, në çerekfinale do të kemi një derbi italian. Në shortin e sotëm janë projektuar edhe çiftet gjysmëfinaliste: fituesi i Real Madrid-Çelsi do të përplasjet me fituesin e Mançester Siti – Bajern, ndërsa gjysmëfinalja tjetër do të jetë e kualifikuara e Inter – Benfika kundër fitueses së Milan-Napoli. Duke parë shorti në dukje del fakti se italianet janë kokë më kokë me njëra-tjetrën, kurse Siti përballë Bajernit dhe Realit përballë Çelsit janë padyshim finale të parakohshme dhe do të marrin vëmendjen në turin çerekfinal dhe fitueset e dueleve edhe në turin gjysmëfinal. Milan-Napoli është çerekfinalja e tëra italiane e Ligës së Kampionëve. Dy skuadrat do të përballen për të avancuar më tej, megjithatë prilli do të jetë një muaj që do ta ofrojë plot tre herë këtë sfidë. Kjo pasi që më datën 2, pas ndërprerjes së kampionatit, Milani do të jetë mysafir në “Diego Armando Maradona”, për t’u përballur me të kaltrit në një sfidë të vlefshme për Serinë A. Natyrisht një takim shumë i rëndësishëm për kuqezinjtë, që garojnë për një vend në zonën Champions, por jo aq për napolitanët, që kanë një diferencë të konsiderueshme në krye të renditjes. Më pas do të vijnë dy përballjet për Championsin, me sfidat që do të luhen më 11 ose 12 në “San Siro” dhe 18 ose 19 në Napoli. Tre përballje në harkun e 16-17 ditëve, natyrisht që do të prodhojnë jo pak spektakël. Napolitanët shihen si të favorizuar, nisur nga forma e shkëlqyer që po kalojnë këtë sezon, megjithatë vetë Spaleti e pranoi se historia e Milanit në Champions, mund të bëjë diferencën.