Historike, Federata e Skive organizon kampionatin jashtë vendit

Të pakta janë federatat sportive të Shqipërisë që kanë kapacitete të organizojnë veprimtaritë e tyre vjetore, sipas kalendarit, jashtë vendit. Ka ndodhur në kohërat e vështira më 1997 kur FSHF luante ndeshjet e shtëpisë së përfaqësueses së futbollit në vende të tjera, por këtë herë kemi një rast krejt të kundërt. Një veprimtari kombëtare dhe ndërkombëtare organizohet nga Shqipëria por Shqipëria vetë nuk i ka kushtet brenda saj e për këtë arsye ka zgjedur një vend tjetër. E konkretisht, garat e turneut ndërkombëtar të skive do të zhvillohen në Itali, por në emër të Shqipërisë si vend pritës i aktivitetit. Kështu, sipas njoftimeve, Federata Shqiptare e Skive organizon në datat 20 dhe 21 dhjetor kampionatin kombëtar të skive. Një aktivitet ky që organizohet sipas standarteve ndërkombëtare, në formatin e një takimi ndërkombëtar të skive, ku do të marrin pjesë rreth 200 sportistë nga 40 vende të botës. Kampionati do të zhvillohet në Kronoplatz, në Dolomitet italiane, një ndër destinacionet më të preferuara për sportet dimërore, dhe pjesëmarrësit po sipas standardeve ndërkombëtare do të garojnë në të dy disiplinat, slallomin dhe slallomin gjigand. Do të jenë 6 atletet shqiptarë që do të garojnë në këtë kompeticion, me synimin për të mbajtur lart flamurin kuqezi në një disiplinë që në të vërtetë nuk ka qenë ndër më të spikaturat në sportin shqiptar, por që kohët e fundit falë impenjimit të Federatës Shqiptare të Skive po zhvillohet së tepërmi, duke tentuar në këtë mënyrë që edhe Shqipëria të zërë një vend dinjitoz në hartën botërore të skive. Kompeticioni premton rivalitet dhe emocione të veçanta. Organizatorët do t’i njohin sportdashësit në kohë reale me zhvillimet e një takimi historik për sportet dimërore.