Juventus-Inter do të jetë kryendeshja e kësaj jave në Itali, dy trajnerët po monitorojnë lojtarët e tyre që janë grumbulluar me Italinë ne në eliminatoret e Europianit

Italia u përball mbrëmë në një ndeshje direkte ndaj Ukrainës. Kjo pasi Anglia është kokë grupi dhe në Europian do të shkojë si vend i parë. Gjithsesi, për skuadrën axurre do të duhet ende kohë që të kthehet në majat e futbollit, pas shumë zhgënjimesh gjatë viteve të fundit. Ndërkohë, trajnerët e klubeve të Serisë A vijojnë përgatitjet për xhiron e radhës, e cila do të luhet në fundjavë, pasi të jenë mbyllur të gjitha duelet eliminatore të skuadrave kombëtare në kuadër të kualifikueseve të Europianit “gjermani-2024”. Në kuadër të kësaj xhiroje, Juventusi dhe Interi do të përplasen kokë më kokë në një duel ku ka rëndësi rezultati, por edhe performanca. Në fakt, nuk duhet të jetë e lehtë përgatitja e një ndeshje që vlen kreun e klasifikimit në Itali dhe psikologjikisht edhe më të rëndësishme në luftën për titull. Bëhet fjalë për Juventus-Inter, sfidën e madhe me të cilën rikthehet Serie A pas pauzës së kombëtareve me Alegrin dhe Inzagin që për pjesën më të madhe të ditëve nuk do të kenë në dispozicion disa nga lojtarët më të mirë, që janë të grumbulluar me kombëtaret respektive. Tek Juventusi Alegri la pushim gjatë fundjavës ata pak lojtarë që nuk ishin me kombëtaret, bardhezinjtë kanë nisur përgatitjet këtë të martë ku në grup janë rikthyer dy serbët, Vlahoviç që luajti vetëm gjysmë ore të pjesës së dytë në sfidën me Bullgarinë dhe Kostiç, që u zëvendësua pesë minuta para fundit. Ndërkohë të mërkurën rikthehen dhe lojtarët e Italisë, Kieza, Kean Kambiaso dhe Gati ndërsa të enjten grupi pritet të kompletohet me Dzezny Rabiot dhe Yildiz, ndërsa i fundit që do të bashkohet me skuadrën e Bremer që kthehet të premten. Inzagi, për momentin, ka pak lojtarë në dispozicion, vetëm Mkhitarian nga titullarët. Në apel mungojnë plot 16 lojtarë dhe për të pasur grupin të kompletuar duhet të presë të enjten, ditë e rikthimit të amerikano-jugorëve Karlos Augusto, Sançez dhe Lautaro. Bashkë me armenin në stërvitje janë dhe Kuadrado, Calhanoglu është rikthyer nga Turqia me një grip të lehtë, dhe Bastoni që vazhdon me terapitë dhe pret të kuptojë kohën e rikuperimit. Më pas do të rikthehen edhe lojtarët italianë , Açerbi, Barela, Darmian, Dimarko e Fratesi si dhe lojtarët e tjerë Dumfries, de Vrij, Asllani, Somer, Thuram dhe Arnautoviç. Interi këtë edicion është favorit kryesor për të fituar titullin kampion në Itali. Trajneri Inzagi ka në dispozicion një grup shumim cilësor, mes të cilëve edhe shqiptarin Kristjan Asllani.