Kaçe zbarkon në Greqi e firmos për Volos, Rrapaj lë Partizanin e kalon në Bullgari

Mesfushori i Kombëtares, i larguar prej saj tashmë, Ergys Kaçe, braktisin kampionatin lituanez dhe u rikthyer në kampionatin grek, këtë herë me Volos, klub me të cilin nënshkroi një kontratë. Natyrisht që kjo është një lëvizje e mirë për mesfushorin kuqezi, pasi ai në kampionatin helen ka një emër të mirë. Nga ana tjetër, Arinaldo Rrapaj, lojtar që spikati në Superligën tonë, braktisi Partizanin në orët e fundit të merkatos dhe zgjodhi të bëhet pjesë e Ludogoretzin në kampionatin elitar të Bullgarisë. Këto lëvizje dëshmojnë se lojtarët e kampionati tonë apo dhe legjionarët, kanë vlera në treg dhe dinë të bëjnë lëvizjet e duhura për vazhdimësinë e karrierës së tyre.

Kaçe, një tjetër shans në kampionatin grek

Ergys Kaçe rikthehet në futbollin grek. Ish-mesfushori i kombëtares shqiptare, firmosi me Volos, skuadër që renditet në vendin e gjashtë në Superligën greke. 29-vjeçari luajti fazën e parë me lituanezët e Panevezis, ekip me të cilin regjistroi gjashtë ndeshje dhe një gol. Kaçe, i cili provoi një aventurë në Superiore me Partizanin, ka luajtur më parë në Greqi me PAOK-un, Panathinaikosin, AE Larisën dhe Arisin e Selanikut. “Mirësevini @ergyskace26. PAE Volos njofton blerjen e mesfushorit 29-vjeçar, Ergus Kaçe. Kaçe, i cili kaloi testet e nevojshme mjekësore dhe ergometrike, nënshkroi sot kontratën e re me Volos dhe do të integrohet menjëherë me ekipin. Kaçe ka garuar për disa vite në Superligën greke me fanellat e PAOK-ut, Panathinaikosit, Larisës dhe Arisit, ndërsa ka luajtur edhe për Veria, Viktoria Plzen dhe Partizani i Tiranës. Në gjysmën e parë të këtij sezoni, ai luajti në Panevezys lituaneze ku pati 6 paraqitje dhe 1 gol. PAE Volos mirëpret Ergys Kaçe në familjen e saj”, shkruan klubi bgrek në faqen e tij zyrtare.

Arinaldo Rrapaj ikën nga Partizani, zyrtarisht kalon në kampionatin bullgar

Lojtari i Partizanit, Arinaldo Rrapaj, do të vijojë karrierën e tij në Bullgari tek Ludogorets. Klubi i kuq humbet një tjetër lojtar të rëndësishëm, ndërkohë që në anën tjetër vijon të mbushë arkën, teksa edhe 200 mijë euro të tjera do të shkojnë në arkën e “demave”. Ludogorets vendosi të paguante klauzolën e futbollistit, i cili ka shkëlqyer me fanellën e Partizanit gjatë një vitit e gjysmë që ishte pjesë e të kuqve. Fantazisti aktivizua në gjysmën e parë të këtij edicioni në 18 ndeshje duke shënuar dhe 1 gol, ndërsa edicionin e shkuar luajti 32 ndeshje duke e gjetur rrugën e rrjetës dhe në 6 raste. 24-vjeçari në të shkuarën ka qenë pjesë e Flamurtarit ku dhe spikati, për të kaluar 1 sezon më pas tek Skënderbeu e për të vijuar tek Partizani. Mesfushori është aktivizuar me moshat e Shqipërisë, ndërsa u grumbullua dhe nga skuadra e parë për ndeshjet miqësore me ekipin e parë të Kombëtares ndaj Katarit dhe Arabisë Saudite. Një hap përpara për futbollistin, i cili do provojë që ta përdorë si trampolinë kampionatin bullgar për të avancuar dhe më tej në futbollin europian. Rrapaj bëhet lojtari i tretë i formacionit që largohet jashtë Shqipërisë gjatë këtij janari, teksa më parë edhe Xhuljano Skuka u largua drejt Francës dhe Eneo Bitri drejt Çekisë.