“Kam frikë, duket sikur do prishet “/ Zbardhen detaje të reja nga rrëzimi i avionit të Emiliano Sala, ja momentet e fundit të jetës së tij (Video)

Piloti David Ibbotson u ka thënë miqve të tij se avioni kishte diçka të “dyshimtë” përpara fluturimit që i mori jetën futbollistit argjentinas, Emiliano Sala.

David Ibbotson dëgjohet në një audio të siguruar nga BBC duke thënë “Unë do të vesh jelekun tim të shpëtimit”, në fluturimin nga Franca drejt Uellsit.

Ai i tha një shoku se kishte dëgjuar një “zhurmë” gjatë një fluturimi të mëparshëm.

Avioni u rrëzua në Kanalin Anglez në vitin 2019. Pamjet tregojnë momentin e fundit kur piloti dhe Emiliano Sala u panë gjallë.

Sala, i cili luante me klubin francez Nantes, sapo kishte nënshtruar një kontratë 15 milionë paund me klubin e Premierligës, Cardiff City, kur avioni u rrëzua duke i marrë jetën.

Defektet teknike

Avioni pilotohej nga Ibbotson, një pilot me kohë të pjesshme, i cili nuk kishte licencë për të transportuar pasagjerë dhe trupi i të cilit nuk u gjet kurrë.

Futbollisti po kthehej në Francën perëndimore për të marrë disa sende personale dhe për t’u thënë mirupafshme miqve të tij. Ai fluturoi për në Nante të shtunën, 19 janar, dhe planifikoi të kthehej të hënën, ditën e aksidentit tragjik ajror.

Audioja e një telefonate të Ibbotson me një pilot është siguruar nga BBC, duke zbuluar për herë të parë vështirësitë teknike me të cilat ai ishte përballur gjatë udhëtimit për në Francë.

Ai thotë se dëgjoi “një zhurmë” gjatë fluturimit dhe se mund të ndjente një “mjegull shumë të ulët” brenda aeroplanit  Piper Malibu.

“Unë jam në mes të kanalit dhe ‘bang’,” i tha Ibbotson mikut të tij, Kevin Jones, në lidhje me fluturimin e tij për në Nantes.

“Po fluturonim së bashku dhe pastaj “boom”. Mendova, “çfarë nuk shkon?” Kështu që unë vendosa gjithçka përpara dhe kontrollova parametrat e mi, gjithçka ishte mirë dhe ende po fluturonte”, tha ai.

Më pas vazhdoi: “Herë pas here ju ndjeni si mjegull. Mund ta ndjeni atë, shumë, shumë të ulët në të gjithë kornizën e avionit.”

59-vjeçari u shpreh se gjatë udhëtimit e kuptoi gjithashtu se marshi i majtë i frenimit nuk po funksiononte pas uljes në aeroportin Nantes Atlantique.

“Ky avion duhet të kthehet në hangar”, i tha ai mikut të tij.

Biseda u regjistrua aksidentalisht dhe është marrë nga podkasti i BBC, Transfer: The Emiliano Sala Story.

Sa i përket fluturimit për në Cardiff, Ibbotson shtoi: “Nesër do të vesh jelekun tim të shpëtimit”.

Dy personat e vetëm në aeroplan ishin Emiliano Sala dhe Ibbotson, nga Crowle, trupi i cilit nuk u gjet kurrë.

“Kam frikë”

Futbollisti kishte shprehur frikën e tij rreth sigurisë së aeroplanit në një mesazh zanor dërguar miqve më të ngushtë teksa avioni po lëvizte në pistën e Aeroportit Nantes Atlantique.

Lojtari u tha atyre: “Unë kam frikë” dhe se avioni “duket sikur po prishet”.

“Nuk e di, nëse dikush do të më kërkojë, nuk do të më gjejë”, u tha Sala miqve të tij, duke parashikuar një aksident të mundshëm.

Cardiff City FC i kishte ofruar një udhëtim komercial nëpërmjet Parisit, por ai donte më shumë kohë për t’u thënë mirupafshim miqve dhe bashkëlojtarëve në Nantes përpara se të kthehej në Uells për seancën e tij të parë stërvitore me klubin e ri.

Kështu që Willie McKay, njeriu që ndihmoi në ndërmjetësimin e transferimit, caktoi një fluturim privat, direkt nga Nante në Cardiff, përmes një piloti tjetër, David Henderson.

Për shkak se Henderson nuk mund ta përmbushte kërkesat, u zëvendësua nga Ibbotson.

Argjentinasi nuk e dinte që Ibbotson nuk ishte i kualifikuar për të fluturuar.

Ai ishte vetëm një pilot amator dhe nuk kishte licencë për të transportuar pasagjerë ose për të fluturuar gjatë natës.

Rreth një orë pas ngritjes nga pista tre, në Nante, Piper Malibu N264DB humbi kontaktin me radarin mbi Kanalin Anglez dhe grupet e shpëtimit ajror dhe detar u nisën drejt vendngjarjes.

Piloti humbi kontrollin ndërsa zbriste për të shmangur retë dhe ra në Kanalin Anglez, me një shpejtësi të vlerësuar 434 km/h.

Hetuesit e aksidentit ajror zbuluan se futbollisti ishte “i pavetëdijshëm” për shkak të helmimit me monoksid karboni dhe se ndoshta edhe piloti ishte në të njëjtën gjendje.

Trupi i lojtarit u gjet në rrënojat e avionit që u gjet në thellësinë 68 metra nën Kanalin Anglez, dy javë pas përplasjes.

Henderson, i cili organizoi fluturimin, u dënua me 18 muaj burg për mënyrën se si organizoi udhëtimin dhe duke përdorur një aeroplan komercial pa leje.