Kasano sulmon Inzagin: Interi duhet të gjejë trajner tjetër

Antonio Kasano sulmon trajnerin e Interit, Simone Inzagi, vetëm pak ditë pas triumfit në Superkupën e Italisë, 3-0 ndaj Milanit. Interi zhgënjeu në shtëpi, pasi u mposht me rezultatin minimal 0-1 nga Empoli në “San Siro”, duke dalë jashtë garës për titull. Me 13 pikë më pak se Napoli kryesues, kur ka mbetur edhe gjysma e kampionatit, duket e vështirë që Inzagi me të tijtë të shpresojnë ende. Këtë konfirmon edhe Antonio Kasano, që tregohet i ashpër në kritikën e tij me trajnerin Inzagi. “Për mua, ky sezon i zikaltërve është një dështim. Interi dhe Juventusi kanë organikën më të mirë në kampionat, ndaj zikaltrit nuk mund të justifikohen vetëm me zonën Champions. Ne flasim për vështirësitë e Piolit, por ai atë organikë ka dhe nuk mund të kritikohet. Ndërsa Inzagi po, pasi edhe me 10 futbollistë, i kishte shanset të fitonte ndaj Empolit. Menjëherë pas kartonit të kuq, hoqi një sulmues për një mbrojtës, duke tërhequr skuadrën. U zgjua shumë vonë dhe nuk mund të riparonte më dëmet. Mendoj se në korrik Interi duhet të gjejë një trajner të ri, pasi Inzagi nuk më bind aspak”, tha Kasano.