Klubet që luajnë në garat e UEFA-s kanë më shumë afrime se largime, duke dëshmuar ambicie

Klubet e Superiores vijojnë lëvizjet, Vllaznia më aktivja e qershorit

Kategoria Superiore po mendon për sezonin e ri dhe klubet i kanë nisur lëvizjet tashmë. Disa skuadra kanë bërë afrime cilësore dhe duan që këtë periudhë ta mbyllin sa më parë me blerje cilësore, por ka dhe ekipe që nuk e kanë gjetur veten dhe kanë plot mangësi në treg, duke mos gjetur elementët e përshtatshëm. Kuptohet, prurjet më cilësore i bëjnë klubet që kanë gjendjen financiare më të mirë dhe këtu diferencën e bëjnë ata klube që luajnë në Europë në sezonin e ri. Pra, Tirana, Partizani, Vllaznia dhe Laçi bëjnë goditje të studiuara, pra cilësore, me shpresën se do të lënë gjurmë në fazën kualifikuese të kompeticioneve të UEFA-s. Duhet thënë se “Abissnet Superiore” uli siparin me Tiranën kampione dhe Vllazninë fituese të Kupës së Shqipërisë, teksa tashëm skuadrat kanë padyshim vëmendjen te merkatoja dhe 4 prej tyre edhe në eliminatoret e Kupave të Europës. Më poshtë jepen disa lëvizje që ka bërë Vllaznia e Shkodrës, një klub që do të luajë direkt në turin e dytë të Conference League, si fituese e Kupës së Shqipërisë. Natyrisht që Vllaznia ka edhe largime, por emrat që klubi ka prezantuar gjatë ditëve të fundit janë cilësorë dhe mund ta bëjnë diferencën, prandaj Vllaznia ka pritshmëri të larta.

Juriç firmos për Vllazninë

Fundjavën që lamë pas klubi i Vllaznisë bëri një tjetër goditje në treg, duke afruar një lojtar kroat, një prurje që mund të ndikojë pozitivisht për ambiciet e skuadrës në Conference League. Kështu, Vllaznia ka prezantuar marrëveshjen me Marko Juriç, lojtarin kroat që vjen nga radhët e skuadrës boshnjake së Shiroki Brijeg ndërsa ka firmosur një kontratë njëvjeçare me të drejtë rinovimi edhe për një tjetër vit. 27-vjeçari do të vendoset menjëherë në dispozicion të trajnerit Mirel Josa ndërsa është një alternativë e vyer për ndeshjet e Conference League me shkodranët që shorti i vendosi përballë ekipit rumun të Universitatea Kraiova. Vlen të theksohet se palët e njohin njëra tjetrën pasi Juriç ka qenë në fushë teksa Vllaznia dhe Shiroki janë përballur në edicionin e kaluar të Conference League ku fitimtarë dolën kuqeblutë. Kështu, pasi humbën shërbimet e Mevlan Adilit, shkodranët kanë konfirmuar kështu zëvendësuesin e tij ndërsa në këtë repart është afruar edhe Dajan Shehi.

Raporti mes largimeve dhe afrimeve

Duke bërë një bilanc të afrimeve dhe largimeve nga kampi shkodran konstatohet se largimet si numër janë më shumë, por referuar cilësisë së emrave afrimet janë shumë më cilësore, janë goditje që me sa duket trajneri Mirel Josa ka kohë që i ka pikasur dhe klubi po u jep mundësinë lojtarëve dhe stafit. Nga largimet spikasin emrat e Ardit Krymit dhe Viktor Da Silvës si më të rëndësishmit, por të larguar konsiderohen edhe Dianje, Xhurxheviç, Mustedanagiç, Fangaj dhe mbrojtësi Mevlan Adili. Të afruar deri tani llogariten Loris Boshnjaku (mesfushor), Dajan Shehi (mbrojtës), Kaina Nunez (sulmues), Rejan Alivoda (mesfushor), Kristijan Vulaj (mesfushor) si dhe Marko Juriç (mbrojtës).