Konte do të largohet nga Totenhemi në fund të sezonit

Në Premier League është e vështirë të bësh sukses në vijimësi, për shkak të rivalitetit shumë të madh që ka kampionati anglez, aty ku ka të paktën 6 ekipe që e nisin garën si pretendente për titull. Në këtë kuadër, presioni tek pankinat është shumë i madh. Ndërkohë, eksperti italian i transferimeve Xhianluka Di Marzio konfirmon se Antonio Konte do të largohet nga Totenhem në fund të sezonit. Trajneri italian nënshkroi një marrëveshje 18-mujore në nëntor 2021 dhe tani pritet të largohet nga Londra Veriore kur kontrata e tij të skadojë në qershor. Eksperti italian i transferimeve, ka pohuar se ish -trajneri i Interit dhe Juventusit me siguri do të largohet nga Spurs gjatë verës. Konte është lidhur me një lëvizje te Juventusi, por Zonja e Vjetër mund të mos luajë as në Evropë sezonin e ardhshëm pas një zbritjeje prej 15 pikësh në Serie A. Sipas “Gazzetta”, edhe UEFA mund të marrë masa kundër “Bianconerëve” duke i ndaluar ata nga garat evropiane për një ose më shumë sezone. Konte ka drejtuar Zonjën e Vjetër dhe Interin, duke fituar tituj të Serie A. Është teknik fitues, por këtë herë mund të tërhiqet.