Kukësi fitore entuziazmuese kundër Tiranës, Kastrioti humb me Bylisin

Java e 19-të e Kategorisë Superiore nisi dje me dy takimet e para të saj, ku padyshim ra në sy humbja e Tiranës 0-2 përballë Kukësit, një disfatë zhgënjyese po të mendohet se bardheblutë janë kryesues të garës dhe pretendentët kryesorë për ta fituar titullin. Ishte një ngecje e papritur në dukje, por deklarata e trajnerit Orges Shehi që kjo Tiranë nuk ka cilësi sa ajo e sezonit të kaluar bindin që grupi ka probleme dhe objektivat janë vënë në diskutim, paçka se Tirana e ruan kreun e renditjes edhe pas kësaj jave.  Pra, Tirana del me 0 pikë nga sfida e javës së 19-të të Kategorisë Superiore, në duelin si udhëtues përballë Kukësit, duke ndalur serinë e fitoreve radhazi (3), që e ngjitën në vendin e parë. Skuadra verilindore, më këmbëngulëse në lojën e saj, realizoi nga një gol në çdo pjesë, duke e ruajtur rrjetën të paprekur. Në minutën 35-të, në zhvillimet e një goditjeje këndi, Opong shtyn topin me kokë drejt rrjetës, i shërbyer nga Mbarak. Pjesa e parë u mbyll me epërsinë e vendësve, që e gjetën edhe golin e sigurisë, me anë të Bytyçit, që realizoi po me kokë në minutën e 58-të. Kaq mjaftoi që Kukësi të merrte një fitore të pastër 2-0 që ngre moralin për të synuar zonën europiane. Ndërkohë përplasja e mbijetesës mes Bylisit dhe Kastriotit, e zhvilluar në “Adush Muça”, u mbyll me fitoren minimale të vendësve falë golit të shënuar nga Doi në minutën e 75-të. Një sfidë me jo pak tension në Ballsh, çka reflektohet edhe nga kartoni i kuq i marrë nga trajneri i Bylisit, Shensoi.