Kukësi fitore “magjike” në Rrogozhinë përballë Egnatias, i largohet fundit

Në kuadër të javës së 18-të të Superligës, dje ishte surprizë e bukur fitorja e Kukësit në transfertë, pikërisht në fushën e vështrië të Rrogozhinës, përballë Egnatias, një trepikësh që i vlen shumë ekipit verilindor të lerë pas krizën e të mendojë për mbijetesën fillimisht e pse jo më pas për Europën. Kështu, Kukësi arriti një fitore të rëndësishme 1-2 përballë Egnatias në stadiumin “Arena Egnatia”. Ekipi i Rrahman Hallaçit triumfoi me përmbysje dhe përkohësisht i largohet vendit të fundit në renditjen e Superiores. Skuadra nga Rrogozhina humbi një shans të mirë për t’u ngjitur në vendin e tretë, ndërkohë që regjistroi ndeshjen e tretë pa fitore në fushën e vet. Egnatia fitoi një penallti në minutën e 35-të, të cilën e ekzekutoi saktë braziliani Fernando. Kukësi reagoi në pjesën e dytë, shënoi dy gola dhe u rikthye në shtëpi me tri pikë të arta. Barazimi erdhi në minutën e 70-të, moment kur gjuajtja e Edison Ndrecës u devijua në portën e tij nga Renato Malota. Verilindorët morën zemër dhe katër minuta nga fundi gjetën golin e fitores. Boshnjaku Mirza Delimedjaç, i cili u fut në pjesën e dytë, realizoi një gol të bukur dhe i dhuroi fitoren ekipit të tij.