Kushta: Kjo është Kombëtarja më e mirë e të gjitha kohërave

Ikona e futbollit vlonjat dhe atij kombëtar, Sokol Kushta, dikur idhull për tifozerinë shqiptare për golat spektakolarë, sukseset dhe natyrisht kontributin në futbollin shqiptar, ka lëshuar një mesazh në profilin e tij në rrjetin social “facebook”, ku i thur elozhe ekipit përfaqësues pas suksesit të fundit ndaj Polonisë, si dhe trajnerit Silvinjo të cilin e quan të merituar, një njeri punëtor që dashuron vendin dhe kombëtaren e atij vendi që i ka dhënë mundësinë të shpalosë cilësitë e tij si trajner. Kushta nuk heziton të thumbojë “plakushin” Reja, i cili aty i kishte lojtarët, në të gjitha repartet, por nuk i shihte dhe duket qartë se zhgënjeu, pasi këta futbollistë po i merr Silvinjo e ka bërë me ta një grup fantastik që dhurojnë spektakël, dhurojnë lojë të bukur e rezultateve. “Ky status që në fillimet e trajnerit të ri.. Është ky ndryshim që solli gjithë këto ndeshje dinjitoze të Kombëtares. Shumë veta ishin skeptikë te ky ndryshim. Unë besova te Silvinjo që në momentet e para për një arsye… që ky njeri erdhi si një punëtor, si një qytetar shqiptar, si një njeri që dashuron vendin ku i dha mundësinë të shprehi mundësinë e tij profesionale. Unë s’dua te flasë për fitoren, por për bazat që ky hodhi tek ekipi ynë… Kur trajneri Reja pensionisti diskutonte për ekipin tonë, thoshte kaq ka mundësi, ky është temperamenti shqiptar, s’ka lojtarë etj. Jooo zotëri, ti ishe i paaftë të drejtoje këtë Kombëtare. Shqipëria ja që ka mundësi, ja që ka sulmues, mbrojtës, mesfushorë, që ti nuk i aktivizoje. Ja që ne mund të lozim me dinjitet, me forcë, me taktikë. Ja që jemi altruistë në lojë… por çfarë ndodhi?”, shkruan Kushta ndër të tjera në mesazhin e tij.

Kombëtarja më e mirë e të gjitha kohërave

Kushta thotë se Silvinjo është tipi i trajnerit që na duhej, trajneri që nuk ka prioritet lekët se sa rezultatet dhe karrierën. Sipas tij, Kombëtarja e tanishme është më e mira e të gjitha kohërave, pasi është hera e parë që bën katër ndeshje radhazi me rezultat pozitiv e lojë bindëse. “Silvinjo tregoi, që trajneri mundet të bëjë histori kur nuk vijnë vetëm për lekë. Unë besoj se kjo është Kombëtarja me e mirë e të gjitha kohërave. Pse e them? Se asnjëherë Kombëtarja s’ka bërë 4 ndeshje radhazi dinjitoze. Një kombëtare mbarëshqiptare që ka lozur nga minuta e parë deri në të 98 minutë”, shkruan më tej Kushta.

Rruga për në Gjermani është shtruar

Interesante dhe emocionale është ajo që shkruan Kushta në rreshtat e fundit të postimit të tij, ku thotë se rruga për në Europianin e Gjermanisë është shtruar tashmë, e ndryshe nga Francë-2016 ku shkuam me ndonjë trepikësh në tavolinë, këtë herë me meritë të plotë të ekipit. “Unë besoj se rruga për në Gjermani sot është shtruar dhe ju garantoj që do më shijojë më shumë se Franca, se jemi me pikët tona jo, të UEFA-s. Urime dhe suksese për ndeshjen me çekët”, përfundon Kushta mesazhin e lëshuar në postimin e tij në rrjetin social “facebook”. Natyrisht, fjala e tij ka shumë vlerë, pasi ka qenë ndër të parët që shprehu intuitën e pagabueshme që Silvinjo është një trajner që erdhi në krye të Kombëtares për të fituar, i etur për sukses dhe një trajner punëtor për të cilin kishte nevojë përfaqësuesja.