Laçi luan “tenis” përballë Teutës, fitore me gjashtë gola për t’i ikur krizës

Java e tretë e Kategorisë Superiore u mbyll ditën e djeshme, me takimin e fundit të saj, atë ndërmjet laçit e Teutës. Ishte një sfidë që kishte tërhequr vëmendje të madhe, pasi të dyja skuadrat ishin shndërruar në kantiere ku punohej për të përtërirë grupet, por duket se merkato po i jep të drejtë Laçit, që dje korri një fitore të madhe e më të thellën deri më tani për këtë sezon, e që me trepikëshin e arritur shpëton veten nga kriza, por i jep drejtim edhe karrierës së trajnerit Skerdi Bejzade.

“Tenis” kurbinas

Laçi argëtohet dhe bind në shtëpi ndaj Teutës, me kurbinasit të cilët shijuan fitoren e parë sezonale në javën e tretë të kampionatit. Skuadra e Bejzades triumfoi 6-1 ndaj të besuarve të Diego Longo-s, në një ndeshje të dominuar nga “bardhezinjtë”. Durrsakët rezistuan vetëm nëntë minuta, me Sobovale që kaloi në avantazh Laçin. Vendasit e shfrytëzuan në maksimum momentin e mirë dhe në minutën e 24-të dyfishuan me mesfushorin Ujka. Teuta bëri pak në fraksionin e parë për të ndryshuar panoramën e sfidës, ndërsa kurbinasit i shkuan pranë golit të tretë, madje duke gjetur edhe traversën në minutën e 31-të. 2-0 dhe kështu u mbyll pjesa e parë, ndërsa në 45 minutat e dyta, Laçi tregoi sërish forcën dhe realizoi edhe katër herë të tjera. Pas dhjetë minutash lojë, Uilliam çoi rezultatin në 3-0, ndërsa në minutën e 61-të, vendasit festuan përsëri, këtë herë golin e katërt të realizuar nga Bajramaj. “Poker” i Laçit dhe Teuta u dorëzua pa kushte dhe “bardhezinjtë” shkundën përsëri rrjetën e durrsakëve, me Ujkën që shënoi golin e pestë për kurbinasit dhe të dytin personal. Në kohën shtesë, skuadra e Longo-s shënoi golin e “nderit” me Gjatën që realizoi një gol mjaft të bukur, por në fund shërbeu vetëm në aspektin personal. Teksa ndeshja u vulos nga Myrta në minutën e 90+2′, që shënoi golin e gjashtë për Laçin. Në fund 6-1, fitorja e parë e Laçit dhe një sinjal i fortë nga skuadra e Bejzades që shkon kështu në kuotën e 4 pikëve në vendin e gjashtë, ndërsa Teuta pëson humbjen e parë sezonale dhe në dy ndeshjet e luajtura krenohet me vetëm një pikë duke zbritur në vendin e nëntë.

Longo: Kështu s’mund të vazhdohet

Trajneri i Teutës, Longo, jo vetëm shfaqi pakënaqësi për ekipin e tij, por e quajti të papranueshëm lojën dhe rezultatin për ekipin durrsak. “Sot gjithçka ishte e pabesueshme, humbëm çdo gjë që mund të humbnim. Gjumsi ishte vetëm 20 minuta sulmues, por pastaj ndryshuam, ne u munduam por nuk kemi bërë atë që kemi provuar. Kemi pasur probleme me disa lojtarë, ndaj ndryshuam. Por nuk është problem i Gjumsit, apo Jazxhi, apo Beqjes, por i të gjithëve, si skuadër, si staf e të tjerë. Jam i mërzitur pasi nuk luajtëm, ndaj jam i mërzitur. Jam i mërzitur edhe për tre pikët, por ato nuk janë gjë në krahasim me mënyrën se si skuadra nuk luajti sot mbi atë që punojmë. Jam më i mërzitur me veten se ekipin se përgjegjësia është e imja”, tha Longo. Rivali i tij, trajneri i Laçit, Skerdi Bejzade, u shfaq i lumtur për fitoren dhe ishte një start shumë i mirë i tij në krye të ekipit kurbinas.

 

Superiore, java 3

Të mërkurën

Egnatia-Erzeni                        4-3

Dinamo-Kukësi           2-1

Të enjten

Tirana-Skënderbeu      3-1

Vllaznia-Partizani        0-0

Të premten

Laçi-Teuta                   6-1

 

Renditja

Nr.Ekipi         Pikë

1.Tirana           7

2.Skënderbeu  6

3.Egnatia         6

4.Vllaznia        5

5.Partizani       4

6.Laçi              4

7.Dinamo        3

8.Erzeni           2

9.Teuta            1

10.Kukësi        0