Laçi turpëron Tiranën në kryeqytet, fitorja e kurbinasve vjen nga ish-i bardheblu Josa

Ditën e djeshme u luajt ndeshja e fundit e javës së shtatë të Kategorisë Superiore, pikërisht Tirana-Laçi, e mbyllur me fitoren e kurbinasve me rezultat të thellë 3-0, rezultat që konfirmon krizën e bardhebluve, por nga ana tjetër bën me “krahë” Josën që e nis bukur e me fitore në krye të Laçit. Tirana pëson humbjen e dytë radhazi në “Selman Stërmasi” pas asaj ndaj Erzenit, duke shfaqur një krizë serioze, kurse kurbinasit lënë krizën e tyre dhe ia “ngarkojnë” atë Tiranës dhe e bëjnë këtë brenda në kryeqytet.

Ndeshja

Përplasja e djeshme nisi e qetë nga të dyja skuadrat dhe u deshën gati 20 minuta të regjistrohej rasti i parë, ku goditja e Florent Hasanit përfundon mbi tra. Në minutën e 28-të sulmuesi nga Vushtria vertikalizon për Liridon Latifin që provon duke gjetur devijimin fitimtar të Dajsinanit. Tirana surprizohet në minutën e 41-të kur me mbrojtjen bardheblu të përgjumur, Sobovale përfiton i vetëm para portierit duke shënuar nga distanca e afërt. Ka pretendime për një pozicion jashtë loje të sulmuesit me pasaportë britanike dhe rasti konsultohet me VAR për plot 4 minuta, pas të cilave arbitri e akordon golin të rregullt edhe pse pozicioni duket i dyshimtë. Laçi në avantazh dhe rrezikon në nisjen e të dytës me Tresën që lëshon një top që shkon ngjitur me shtyllën. Shënon në të 58-ën Tirana, por nuk vlen pasi finalizimi i Florent Hasanit anulohet për pozicion jashtë loje. Tirana përpiqet të reagojë, por edhe kur bën diçka gjen përballë një Dajsinani të pakalueshëm, si ky episod i minutës së 74-t. Vetëm një minutë më pas është Florent Hasani që vepron bukur në kontroll dhe goditje por portieri i Laçit është i pakalueshëm. Sobovale ka rastin ta mbyllë në të 89′ kur del i vetëm me portën, por harkimi i tij shkon jashtë shtyllave të Likës. Megjithatë me një Tiranë të çoroditur nuk stepet anglezi, në minutën e parë të shtesës bën lëmsh mbrojtjen duke e tërhequr pas vetes, kthen te Manellari që nuk gabon për golin e 2-0. Tirana në tapet edhe pse fytyra e Josës nuk shfaq emocione, por makthi i bardhebluve tanimë jashtë çdo skeme taktike, s’ka mbaruar, pasi në të 93-ën Laçi del sërish në një kundërsulm dhe Serxhio Ujka kalon te Taleb që shënon golin e 3-0. Tirana zyrtarisht në krizë, Laçi ka dalë nga kriza e tij në kurriz të saj, duke i marrë edhe vendin e tretë në renditje.

Josa analizon skuadrat, sheh Laçin një grup të motivuar

Trajneri i Laçit, Mirel Josa, i cili mori drejtimin e ekipit kurbinas vetëm pak ditë më parë, theksoi pas ndeshjes së djeshme se ka në përbërje një grup të ri shumë të motivuar. “Të themi të drejtën nuk kemi ndryshuar gjë taktikisht, thjesht lojtarët ishin më të motivuar, jo se nuk ishin në të tjerat. Unë kam ndjekur skuadrën gjatë gjithë kohës, jo vetëm Laçin, por të gjithë kampionatin. Nuk mund të vazhdohet përherë të fitosh, ne duam të fitojmë të gjitha, por problemi është që duhet të jemi shumë të vëmendshëm në këto momente se një fitore me Tiranën nuk është se na nxjerrë ku duam ne, duhet të marrim ndeshjet një nga një dhe të shohim se ku mund të arrijmë. Duhet të kemi parasysh që kjo fitore të mos i shtojë presionin skuadrës”, tha Josa.

Java 7

Të dielën

Egnatia-Teuta              0-1

Skënderbeu-Partizani  1-0

Të hënën

Kukësi-Erzeni             2-1

Dinamo-Vllaznia         1-1

Të martën

Tirana-Laçi                  0-3

Renditja

Nr.Eipi           Pikë

1.Egnatia         13

2.Skënderbeu  12

3.Laçi              10

4.Tirana           10

5. Vllaznia       9

6.Partizani       8

7.Erzeni           8

8.Teuta            8

9.Dinamo        7

10.Kukësi        7