Leo Mesi largohet nga Paris San Zhermen, destinacioni i ri është Barcelona ose Arabia

Merkato ka nisur me surpriza të shumta. Jo për lëvizjet më të shtrenjta, pasi ato do të ndodhin në ditët në vijim sepse sezonet nuk janë mbyllur ende në disa vende, por për shkak se në qendër të vëmendjes është kampioni në fuqi i botës Lionel Mesi, një nga futbollistët më të mirë të historisë. Mesi do të largohet nga klubi francez i PSG-së ku ndodhet aktualisht dhe me gjasë do të firmosë sërish me Barcelonën, por nuk përjashtohet mundësia e kalimit në Arabinë Saudite, tek ndonjë klub që është gati të bëjë çmenduri financiare. Lajmin e ka dhënë trajneri i klubit francez, Kristof Galtier, i cili në konferencën për shtyp në prag të ndeshjes me Klermont, pranoi se argjentinasi do të luajë për herë të fundit në “Parkun e Princave”. “Kam pasur privilegjin që të stërvit lojtarin më të mirë të historisë së futbollit. Nesër do të jetë ndeshja e tij e fundit në ‘Parkun e princave’. Shpresoj të respektohet në mënyrën e duhur’, deklaroi Galtier. Duke folur për eksperiencën 2-vjeçare të yllit argjentinas në klubin francez, tekniku i PSG-së pranoi se veçanërisht në sezonin aktual, Mesi u shndërrua në një element mjaft të rëndësishëm për skuadrën. “Sezonin e parë iu desh të ambientohej, ndërsa këtë vit tregoi në fushë se ishte një nga elementët më të rëndësishëm të skuadrës. Kritikat për të i gjej të pavenda, pasi në një sezon të çuditshëm si ky i Botërorit ka shënuar 21 gola dhe ka dhënë 22 asiste, duke qenë gjithmonë në shërbim të ekipit”, u shpreh trajneri. Lionel Mesi iu bashkua PSG-së në verën e 2021-shit dhe firmosi një kontratë 2-vjeçare, e cila skadon më 30 qershor të këtij viti. Pavarësisht ofertës nga klubi francez, ylli argjentinas vendosi të mos e rinovojë bashkëpunimin, kjo edhe për faktin që asnjëherë nuk arriti të krijojë afeksionin e duhur me tifozerinë e PSG-së, që e ka vërshëllyer dhe kritikuar në jo pak raste. E ardhmja e Mesit është ende për t’u vendosur, pasi Barcelona po bën përpjekje për ta rikthyer, teksa opsione mbeten edhe Arabia Saudite e ShBA-ja. Ndërkohë, Paris San Zhermeni po shihet favorit për t’i siguruar shërbimet e sulmuesit të krahut, Marko Asensio. “L’Equipe” ka njoftuar të enjten se Parisi ka mposhtur konkurrencën e skuadrave të tjera për Asension, të cilit ia ka bërë një ofertë të mirë. Mësohet se atij i është ofruar pagë më e lartë se që e merr te Reali dhe kontratë katërvjeçare me opsionin e vazhdimit për vitin e gjashtë. Në rast se arrihet marrëveshja mes palëve, atëherë Asensio te Parisi do të transferohet si lojtar i lirë pasi kontrata me Realin i skadon në fund të këtij muaji. 27-vjeçari këtë edicion ka shënuar 12 gola dhe ka asistuar 8 herë në të gjitha garat për Realin.