BREAKING NEWS

Lëvizjet e fundit në SPAK/ Paralajmëron Spartak Ngjela: Të akuzuarit e mëdhenj ja vetëm do shpronësohen, por do burgosen

Lëvizjet e fundit në SPAK/ Paralajmëron Spartak Ngjela: Të
x

Sport

Liverpuli e nis aty ku e la sezonin e shkuar, me fitore dhe spektakël ndaj Çelsit

Liverpuli e nis aty ku e la sezonin e shkuar, me fitore dhe spektakël ndaj

“Të kuqtë” mposhtën “blutë” e Londrës me rezultatin 2-0, falë një dygolëshi të Sadio Mane. Zhorzhinjo humb penalltinë e s’shënon dot as golin e nderit

Çelsi i trajnerit Frenk Lampard u përpoq ta niste mbarë sezonin në Premier League angleze, për të sfiduar kampionët në fuqi, Liverpulin e trajnerit Jurgen Klop, por nuk ia doli. Madje s’mundi të shënojë as golin e nderit në fund të takimit paçka se pati rast ideal me një penallti në sekondat e fundit, ku nga pika e bardhë e 11-metërshit gaboi Zhorzhinjo. Një nisje e dobët e bluve të Londrës, në kuadër të javës së dytë të kampionatit anglez, që humbin kështu duelin e parë sezonal me “të kuqtë” e Liverpulit. Këta të fundit e dominuan totalisht ndeshjen, dëshmuar me statistikat e saj, si në goditje drejt portës (8-2), goditje në kuadrat (5-4), mbajtjen e topit (61-39%), kornet (11-1) etj. dhe natyrisht futbolli i jep të drejtë të fitojë atij që luan më mirë, që këmbëngul më shumë dhe guxon më shumë. Këta elementë i pati me shumicë Liverpuli në duelin më të rëndësishëm të javës në Premier League. Pjesa e parë, pavarësisht rasteve të paraqitura, përfundoi në barazim 0-0. Ndeshja u zgjidh në drejtimin e duhur për skuadrën e Jurgen Klopit në fillim të pjesës së dytë, ku afrikani Sadio Mane shënoi dy gola të shpejtë në minutën e 50-të dhe të 54-t, për t’i dhënë “të kuqve” qetësinë e duhur dhe për ta menaxhuar më pas epërsinë dhe fitoren. Çelsi u përpoq të bënte diferencë në sulm në minutat e mbetura, u përpoq me të gjitha mënyrat, por Liverpuli është skuadër e nivelit shumë të lartë sepse vjen si kampione në fuqi e Anglisë, por edhe si skuadër që luan në nivele të larta në Champions. Pra një fitore e merituar për trajnerin Klop që në dy ndeshjet e para në Premier ka siguruar 6 pikë. Ndërkohë, një tjetër duel interesant ishte ai mes Totenhemit dhe Sauthemptonit. “Spurs” ia dolën të fitojnë me rezultatin e thellë 2-5 në transfertën e “St. Mary’s Stadium”, në një ndeshje që nisi menjëherë me një gol të Herri Kejn, por që u anulua pak sekonda më vonë nga VAR, për një pozicion jashtë loje. Skuadra e Hoze Murinjos vuajti jo pak në pjesën e parë dhe Tanguy Ndombele, i hedhur titullar nga portugezi, nuk po arrinte t’i siguronte skuadrës një qarkullim të mirë dhe tranzicion të shpejtë të lojës. Në minutën e 32-të gjërat u komplikuan më shumë për “Spurs”, pasi Dani Ings u fut bukur mes dy qendërmbrojtësve të Totenhemit dhe arriti të shënojë golin e avantazhit për Sauthempton, megjithatë londinezët rikthyen baraspeshën në shtesën e pjesës së parë, me anë të Son Hueng-Min, i cili shënoi me asistin e Herri Kejn. Në pjesën e dytë Murinjo la në dhomat e zhveshjes mesfushorin francez Ndombele dhe hodhi në fushë argjentinasin Lo Celso, ndërsa kapiteni Harri Kejn u shndërrua në një “assist-man” pasi shërbeu edhe tre herë të tjera për koreanin Son Hueng-Min, i cili nuk gaboi duke kompletuar pokerin e golave personalë në sfidën e sotme. Në minutën e 82-të ishte radha e vetë kapitenit Kejn që të gjente golin e parë sezonal në Premier League dhe të çonte rezultatin në 1-5, para se të largohej nga fusha për t’u zëvendësuar nga holandezi Bergëijn. Në minutën e fundit të kohës së rregullt pati kohë edhe për një tjetër gol për vendasit, që shënuan sërish me sulmuesin Dani Ings, këtë herë nga 11-metërshi, duke u mbyllur 2-5 në favor të Totenhemit.