Lotito e Tare sërish në divergjenca, shqiptari mund të mos rinovojë kontratën

Igli Tare ka qenë shqiptari më i suksesshëm si drejtues i një klubi në Europë. Tare pati fillimisht një karrierë futbollistike që nisi në Shqipëri, vijoi në Gjermani dhe u mbyll me Lacion në Serie A. Ky klub e zgjodhi Taren si drejtor sportiv, dhe menaxhimi që ish-sulmuesi kuqezi i ka bërë klubit lacial është vlerësuar maksimalisht nga kritika sportive italiane e për këtë Tare ka marrë edhe dekorata të ndryshme dhe çmime të ndryshme. Por kur ka kaluar mbi një dekadë që kur e mori këtë detyrë, duket se mes tij e klubit të Lacios kanë nisur divergjencat. Pëshpëritet në mediat italiane se mes Tares dhe presidentit Klaudio Lotito ka një ftohje graduale dhe një largim nga njëri-tjetri, çka nxit idenë e një ndërprerje të kontratës. Edhe më herët është folur për mundësinë e largimit të shqiptarit nga posti i drejtorit sportiv të Lacios, por këtë herë gjërat po shkojnë në këtë drejtim pasi synimet e presidentit Lotito janë për një zëvendësim të shqiptarit me një pjesëtar të familjes. Kështu, mediat italiane kanë zbuluar se lëvizjet e fundit të presidentit Klaudio Lotito, mund të shtyjnë Igli Taren që të refuzojë rinovimin e kontratës që i propozohet. Lotito prej kohësh ka bërë gati një marrëveshje të re trevjeçare me ish-sulmuesin shqiptar, por ky i fundit, sipas “Il Messaggero”, nuk është edhe aq i kënaqur me disa lëvizje që mund të ndikojnë punën e tij në vijim. Lotito është i kënaqur me punën që po bën djali i tij, Enriko, bashkë me Anxhelo Fabianin dhe për të dy pritet ngritje në detyrë duke filluar nga sezoni i ardhshëm. Ideja e presidentit është që Tare të jetë përsëri personi që udhëheq merkaton e klubit, por fjala e tij nuk do të jetë më aq vendimtare pasi djali i Lotitos do të jetë mbikëqyrës në të gjitha lëvizjet që bëhen për afrimet dhe largime te lojtarëve. Pikërisht kjo mund të shtyjë Taren të mos rinovojë dhe t’i japë lamtumirën Lacios.