Lukaku e Dibala drejt Interit, Xheko bën gati “valixhet” e mund të përfundojë në Spanjë

Interi do të bëjë lëvizje të shumta këtë verë, për të mundësuar fitimin e titullit kampion, një objektiv i deklaruar tashmë nga zikaltrit që tani, ende pa nisur mirë sezoni i ri në Serinë A italiane. Ndërkohë, emra të ndryshëm qarkullojnë në media si përforcime të Interit, megjithëse jo të gjithë emrat që lakohen përfundojnë atje ku dëshirojnë apo dëshirohen. Gjithsesi, mediat sportive italiane shkruajnë se Romelu Lukaku dhe Paulo Dibala janë gjithmonë e më pranë Interit, duke shtuar ndjeshëm cilësinë, por edhe numrat në sulm, ndaj zikaltrit janë duke menduar edhe largime në këtë repart, për të shmangur mbipopullimin. Një nga emrat në krye të listës së atyre që mund të largohen, është boshnjaku Edin Xheko, i cili iu bashkua zikaltërve verën e kaluar për të zëvendësuar Lukakun, por me rikthimin e “Big Rom”-it, mund të detyrohet të largohet. Natyrisht Inzagi do të donte ta mbante ende edhe një sezon Xhekon, por vetë boshnjaku e di mirë që do të jetë zgjedhja e katërt apo e pestë në sulm dhe vështirë se do të preferonte një rol të dorës së dytë. Për më tepër, edhe ofertat në drejtim të tij nuk mungojnë, me Juventusin që i ka ofruar të bëhet zëvendësuesi i parë i Dushan Vlahoviç, por edhe Valencian e Xhenaro Gatuzos, që është gati ta transferojë në kampionatin spanjoll. Sulmuesi ka kontratë deri në verën e ardhshme me Interin, megjithatë zikaltrit do të pranonin ta linin të lirë edhe pa marrë asgjë në këmbim, pasi do të liroheshin nga një pagë prej rreth 11 milionë eurosh bruto, që merr boshnjaku. Ndërkohë, agjenti që përfaqëson Simone Inzagi dhe Alesandro Bastoni ka insistuar sot se gjithçka është kryer për kontratën e re të trajnerit të Interit, teksa mbrojtësi “do të qëndrojë 100 për qind në Inter”, pavarësisht interesimit të Totenhem, Çelsit dhe Mançester Junajtid. Tullio Tinti është parë duke hyrë brenda zyrave qendrore të Milanit dje në mbrëmje dhe duke dalur jashtë ka folur për gazetarët. Ai ishte aty për të diskutuar zgjatjen e kontratës së trajnerit Inzagit, por siç dihet zgjati kontratën, si dhe Bastonin. “Bastoni për momentin është në pushime. Ai do të qëndrojë 100 për qind në Inter. Ne i respektojmë kontratat tonë dhe jemi të lumtur që të diskutojmë zgjatjen e tyre kur Interi na telefonon”, nënvizoi ai. Me pak fjalë, Interi dëshiron të bëjë një revolucion të thellë në grup këtë verë, për t’i mundësuar trajnerit Inzagi një skuadër të aftë të fitojë titullin në Serie A italiane.