Mançester Siti i papërmbajtur, Haland shënon tregolësh

Sulmuesi norvegjez, Erling Haland, i dhuroi ditën e djeshme një fitore spektakolare Mançester Sitit, që del me pikë të plota në përballjen me Ulves. “Qytetarët” triumfuan me rezultatin 3-0, me autor të të tre golave pikërisht sulmuesin e fuqishëm norvegjez. Vendasit diktuan ritmin e sfidës, megjithatë u desh minuta e 40-të, që pas një asisti nga De Bryjne, Haland ta dërgonte topin në rrjetë dhe t’i dhuronte avantazhin ekipit të tij. Më pas në minutën e 49-të norvegjezi do të gjente sërish rrugën drejt rrjetës, duke shënuar nga pika e bardhë e penalltisë. Teksa vetëm pesë minuta më pas, duke shfrytëzuar një pakujdesi të Jose Sa, Haland shënoi golin e tretë personal dhe të tretin për skuadrën e Guardiolës. Pas raundit të 21-të të Premier League, Mançester Siti renditet në vend të dytë me 45 pikë, teksa Ulverhemptonin në vend të 17-të me 17 pikë.