Marrin fund dilemat, finalja e Kupës Laçi-Vllaznia luhet në “Air Albania” më 31 maj

Kampionati është mbyllur dhe i ka dhënë tashmë verdiktet e tij. Tirana u shpall kampione, për herë të 26-të në historinë e saj, ndërkohë që skuadrat e Laçit dhe të Partizanit si vend i dytë dhe i tretë do të marrin pjesë në Conference League të UEFA-s. Në fundin e tabelës dy ekipe u larguan direkt një kategori më poshtë dhe janë Dinamo dhe Skënderbeu, ndërsa mbetet të qartësohet nëse do t’i ndjekë në këtë rrugë të rënies edhe Egnatia, e cila do të ketë një duel direkt me vendin e tretë në kategorinë e Parë, Korabin, se cili prej këtyre dy klubeve do të jetë në elitë sezonin tjetër. Por sezoni ende nuk ka përfunduar, pasi një tjetër trofe i rëndësishëm është ende në lojë dhe bëhet fjalë për Kupën e Shqipërisë, finalja e së cilës do të luhet në ditën e fundit të majit dhe trofeun e diskutojnë skuadrat e Laçit dhe të Vllaznisë. Për shkodranët është një ndeshje për jetë a vdekje, sepse nuk kanë asnjë shans tjetër të shkojnë në Europë, kurse për Laçin është objektiv pr të përmbyllur një sezon fantastik, sepse vendi i dytë në kampionat pas Tiranës i ka mundësuar pjesëmarrjen direkt në Conference League sezonin tjetër, por ndërkohë dëshiron të bëjë një përmbyllje edhe më të madhe, me trofe, prandaj shihet edhe favorit për të fituar kupën. Por ku dhe kur do të luhet kjo ndeshje. Dje vendimin e mori Federata Shqiptare e Futbollit dhe finalja do të luhet në kryeqytet.

“Air Albania” pret Kupën e Shqipërisë

Sezoni futbollistik 2021-2022 në Shqipëri merr fund me fituesin e Kupës së Shqipërisë, ku në finale janë Laçi dhe Vllaznia. Ka pasur pikëpyetje rreth vendit ku do të luhej kjo finale, por tashmë axhenda e këtij takimi është zyrtare. Finalja Laçi-Vllaznia do të luhet më 31 maj, ora 19:00 në stadiumin “Air Albania”. Kjo ndeshje menaxhohet nga FSHF-ja, e cila pritet të nxjerrë në shitje edhe biletat. Ky trofe vlen 50 milionë lekë, por vlera shtohet rrugës, pasi fituesi i këtij kompeticioni këtë vit kalon direkt në turin e dytë të Ligës së Konferencës, ku sido që të shkojë fati në këtë raund, 450 mijë euro i kanë të garantuar edhe po u eliminuan. Pa dyshim Kupa ka më shumë vlerë për Vllazninë, pasi vetëm duke fituar trofeun mund të sigurojë biletën për në Ligën e Konferencës, pasi Laçi praktikisht e ka siguruar pjesëmarrjen në Europë si nënkampion.

Shanset

Vllaznia nuk është në formën e saj më të mirë dhe ka pasur mjaft probleme gjatë sezonit, duke mos i arritur objektivat që i kishte vënë vetes për titull ose të patë një nga tri vendet e para. Shkodranët e mbyllën kampionatin në vend të pestë, pas Kukësit, i cili gjithashtu nuk siguroi Europën nga renditja e kampionatit. Edhe kuksianët e kanë një shans të shkojnë në Europë, por shansi i tyre është në duart e Laçit, pasi nëse fitojnë kurbinasit Kupën, atëherë në renditjen e kampionatit zbritet një vend automatikisht dhe këtë pozicion e fiton Kukësi. Shanset për të fituar Kupën e Shqipërisë i ka realisht më shumë Laçi, pasi është skuadër më e qëndrueshme, ka më tepër fantazi në lojën e vet dhe ka elementë që bëjnë diferencën. Nga ana tjetër, Vllaznia duhet t’i besojë eksperiencës së trajnerit Mirel Josa.