“Çmenden” sauditët, i ofrojnë Mesit 221 mln euro në sezon

Një tjetër sensacion ndodh me një futbollist të madh si Leo Mesi, të cilit i është bërë një ofertë e pazakontë nga Arabia Saudite. Ai është bërë objektiv i klubit Al-Hilal, i cili është rival i klubit të ri të Kristiano Ronaldos, Al-Nasr. Sipas mediave britanike, për Mesin është përgatitur një ofertë e majme me një rrogë të pabesueshme vjetore prej 221 milionë eurosh. Babai i Mesit dhe njëherësh menaxheri i tij, Jorge, është parë në Rijad ditë më parë, ku thuhet se ka biseduar me klubin arab për një transferim eventual të birit të tij në klubin Al-Hilal. 35 vjeçari është duke e kaluar vitin e fundit të kontratës me Paris San Zhermenin, me të cilin kishte nënshkruar për dy vjet më 2021, kur vendosi të largohej nga Barcelona si lojtar i lirë. Pra, nga vera që vjen, Mesin mund ta shohim duke luajtur prapë në një ligë me rivalin e tij më të madh, Kristiano Ronaldo, i cili paguhet 200 milionë euro në vit në klubin Al-Nasr. Kampioni i freskët i botës ka mundësi të rikthehet edhe në Barcelonë, apo ta vazhdojë kontratën me parisienët, ndërsa flitet se ka oferta edhe nga klubet e ligës amerikane – MLS.