Merkato e varfër, gjysma e Superligës pa asnjë afrim, diferencën e bëjnë Partizani e Tirana

Katër klube të Kategorisë Superiore nuk kanë bërë asnjë afrim deri tani, edhe pse merkato po mbyll muajin e parë të saj. Natyrisht që agati zyrtar deri më 31 gusht u jep klubeve qetësi, pasi janë edhe 70 ditë përpara për të menduar lëvizjet e dëshiruara, por është tronditëse që pothuajse gjysma e klubeve të kampionatit elitar shqiptar të futbollit nuk ka bërë ende një afrim për merkaton e verës. Kështu, klubet e Teutës e të Kastriotit që janë në Superiore nuk kanë mundur të bëjnë ndonjë goditje në treg, por pa lëvizje afruese në merkato janë dhe dy klubet e ngjitura këtë edicion në Superiore, si Bylisi dhe Erzeni. Padyshim që në 20 ditët e para të merkatos duhet të kishte më shumë ndjeshmëri nga këto klube, por kjo ka disa arsye që ka ndodhur. Së pari klubet që janë ngjitur në elitë vijnë me kontigjentin fitues nga Kategoria e Parë dhe do të bëjnë afrime në momentin e duhur, ndoshta ndonjë goditje të orës së fundit në treg. Kurse klubet që ishin më parë në Superiore, si Teuta e Kastrioti, duke mos pasur objektiva të tjerë përveçse të përgatiten, në këtë moment janë “stakuar” dhe po presin me qetësi alternativat e duhura. Nga ky grup përjashtim bën Kukësi, i cili, edhe pse nuk luan në Europë, ka nisur të bëjë lëvizje në treg, duke pasur objektiva seriozë për titull në edicionin e ri.

Tirana e Partizani bëjnë përjashtim

Dy rivalët e fuqishëm kryeqytetas, Tirana e Partizani, jo vetëm që kanë bërë lëvizjet e para në treg, por të dy klubet dëshirojnë ta kompletojnë sa më parë skuadrën për të qenë gati për aventurën e tyre europiane, ku bardheblutë do të luajnë në Champions League, kurse “demat e kuq” do të luajnë në Conference League. Partizani do të jetë skuadër e fortë sezonin tjetër, nisur dhe nga ambiciet e klubit që janë rritur pas ndërtimit të kompleksit të ri dhe stërvitjes e akomodimit të Partizanit në këtë kompleks mjaft modern rrëzë malit të Dajtit. Problemi i vetëm i Partizanit në këtë periudhë lidhet me disa largime, një pjesë edhe elementë cilësorë, pir që klubi i kuq i ka zëvendësuar me emra me përvojë, si Telushi, Hoti, Romero, Da Silva, Rexhepi e Cvetanovski. Nga largimet, më të rëndësishmit janë Zhunior dhe Kallaku, por në dyshim është dhe Esat Mala.Sa i takon Tiranës, kampionët janë duke u përgatitur për një prezantim sa më të mirë në Champions League. Tri afrime janë deri tani të sigurta: Ardit Hila, Albano Aleksi dhe Florent Hasani. Por ngjashëm sikurse Partizani, edhe Tirana vuan nga largimet jo të pakta në këtë periudhë, që kanë sjellë një situatë disi të dyshimtë dhe jo fort premtuese për në fazën paraeliminatore të Champions. Kuptohet, faza përgatitore që po zhvillohet në Turqi do të sjellë efektet e veta pozitive, sepse grupi do të harmonizohet dhe do të forcohet, por ende për momentin nuk ka një blerje “big” që e dëshirojnë klubet që marrin pjesë në Europë dhe Tirana e ka të domosdoshme një lëvizje të tillë, më e pakta një. Presidenti Halili, në daljet për mediat ka deklaruar se të gjitha lëvizjet janë lënë në dorë të stafit e konkretisht të trajnerit Orges Shehi.