Merkato/ Laporte, Siti kërkon 50 mln euro për shitjen e tij

Merkato duket ende larg, por kjo nuk i pengon disa klube ambicioze që të nisin kontaktet me elementët e dëshiruar që tani. Kështu, qendërmbrojtësi Ajmerik Laporte nuk do të jetë pjesë e Mançester Sitit sezonin e ardhshëm. Sipas medieve sportive britanike, spanjolli do të jetë njëri prej lojtarëve të parë që do të largohet në verë nga ekipi anglez, ka njoftuar “Sky Sports” të martën. Bëhet e ditur se Siti tashmë ka caktuar çmimin për Laporten dhe për kartonin e tij po kërkon 50 milionë euro. Barcelona dhe Juventusi janë vetëm disa prej skuadrave që kanë shprehur interesim për 28-vjeçarin. Laporte ka kontratë me Sitin deri në vitin 2025, ndërsa këtë sezon ka regjistruar vetëm 15 paraqitje në të gjitha garat. Ai është pjesë e Mançester Sitit prej vitit 2018, kur iu bashkua nga Athletik e Bilbaos, ndërsa ka edhe 19 paraqitje me Përfaqësuesen e Spanjës.