Mesfushori/ Modriç shpresa e kroatëve: Jo gjithmonë fitojnë favoritët

Arritja në çerekfinale të Botërorit shihet si një sukses për Kroacinë, por për mesfushorin Luka Modriç ajo nuk duhet të ndalet këtu, përkundrazi, të vijojë rrugën drejt titullit, edh pse ndaj Brazilit do të jetë shumë e vështirë. “Ne bëmë një gjë të mirë duke shkuar në çerekfinale, por pavarësisht kësaj, ne ende duam më shumë. Ndeshja më e rëndësishme e turneut na pret ndaj një prej favoritëve për të fituar trofeun. Brazili është gjithmonë favorit, por ne duhet të japim maksimumin si në çdo ndeshje deri tani. Vetëm në atë mënyrë kemi shans. Ne kemi shumë forca, besojmë në veten tone”, tha fituesi i “Topit të Artë”, i cili shtoi ndër të tjera se ekipi i tij duhet të jetë shumë agresiv kundër brazilianëve në mënyrë që të mos i lënë kundërshtarët të posedojnë për shumë gjatë topin. “Kam luajtur disa herë kundër Brazilit, por nuk kemi arritur ende t’i mposhtim. Shpresoj se kjo herë do të jetë ndryshe. Brazili ka lojtarë fenomenalë në çdo pozicion. Duhet të jemi agresivë, të vrapojmë dhe të mos i lëmë të luajnë. Duhet të jemi vendimtarë dhe të mos i lëmë t’i afrohen portës sonë”, vijoi Modriç.