Milani mposht Fiorentinën dhe vë një dorë tek titulli, Bonuçi nderon Juventusin

Milanistët fituan ngushtë 1-0, por morën tri pikë me vlerë dhe mbajnë kryesimin me fanatizëm. Gjithsesi, gara mbetet e hapur

Milani ka bërë dje një hap të madh drejt titullit kampion në Itali, pasi kapërceu njërën prej pengesave kryesore, nga rivalët e mbetur në këtë fazë të dytë të Serisë A italiane, Fiorentinën. Një gol i Rafael Leaos i dhuroi fitoren 1-0 Milanit ndaj Fiorentinës në një “San Siro” me mbi 71 mijë tifozë kuqezinj. Portugezi përfitoi nga një largim i topit i pasaktë nga ana e portierit Terraçiano tetë minuta përpara fundit të ndeshjes. 22-vjeçari nuk fali, dërgoi topin në rrjetë dhe gjeti golin e dhjetë sezonal në Serie A, duke u bërë portugezi i pestë që arrin numrin dyshifror të golave në kampionatin italian dhe i pari që ia del pa mbushur 23 vjeç. Theo Hernandez shënoi në minutën e shtatë, por goli ishte i parregullt. Oliver Zhirud pati një shans të artë në pjesën e parë pas asistit të Kesie, por u ndal nga portieri Terraçiano. Stefano Pioli hodhi në fushë Ibrahimoviç dhe Rebiç në pjesën e dytë. Maignan mbajti kuqezinjtë në lojë në minutën e 76-të me një pritje fantastike ndaj goditjes me kokë të Kabral. Për t’i dhënë Milanit triumfin e tretë radhazi mendoi Leao, i cili realizoi golin që afron ekipin e famshëm me titullin kampion. Diferenca me Interin (ka luajtur një ndeshje më pak) ka shkuar 5 pikë dhe Milanit i nevojiten 7 pikë në tre takimet e mbetura, për të nisur festën e titullit, që në “Milanello” mungon prej 11 vitesh. Ndërkohë, po në kampionatin italian, Juventusi mori një fitore të rëndësishme dje ndaj Venecias, për të siguruar jo vetëm top-4 që të dërgon në Champions League, por njëherësh edhe për të mbajtur të ndezur rivalitetin me kryesuesit deri në fund të kampionatit (matematika e lejon të shpresojë për titullin, pavarësisht se ndodhet shumë pikë prapa Milanit (7 pikë). Pra, pikërisht dje, Juventusi ka shënuar fitore në shtëpi ndaj Venecias me rezultat të ngushtë 2:1, në kuadër të javës së 35-të në Serie A. “Zonja e Vjetër” tani është shumë pranë sigurimit të pjesëmarrjes në Ligën e Kampionëve edicionin e ardhshëm. Leonardo Bonuçi u “shndërrua” në qendërsulmues, për t’ia dhënë fitoren vendasve. Qendërmbrojtësi italian realizoi në minutën e shtatë të ndeshjes, pas asistimit nga qendërmbrojtësi tjetër, Mathijs de Ligt. Megjithatë, shifrat u barazuan në minutën e 71-të kur realizoi Aramu. Bonuçi doli sërish në skenë pesë minuta më pas për t’ia dhënë fitoren Juventusit. Me këtë triumf, tani “Zonja e Vjetër” shkon në kuotën e 69 pikëve në vendin e katërt, 10 më shumë se Lacio. Në anën tjetër, Venezia është e fundit në tabelë me 22 pikë, gjashtë më pak se ekipi i fundit që siguron mbijetesën në Serie A.