Milani s’e bën dot mrekullinë, në Champions vijon Atletiko, shkëlqen Mesi me PSG-në

Milanistët shënuan të parët, por përmbysën anglezët 2-1, Atletiko fitoi 3-1 ndaj Portos. Reali fiton klasiken me Interin, shkëlqen edhe Ajaksi

Në grupin A, Lionel Mesi dha spektakël mbrëmë në Paris, ku skuadra e tij PSG mposhti me shifrat e thella 4-1 belgët e Klub Bruzhit. Në këtë sukses argjentinasi shënoi një supergol dhe një tjetër me penallti, kurse dy golat e tjerë i shënoi Kilian Mbape. Një fitore që mundësoi mbylljen në vend të dytë në grup, por mjaftueshëm për të kaluar në turin tjetër. Vendin e parë me 12 pikë e meritoi Mançester Siti, që mbrëmë humbi 2-1 përballë Leipzigut. Gjermanët në vend të tretë shkojnë direkt në Europa League. Grupi B ishte padyshim më emocionuesi i mbrëmjes së djeshme. Milan-Liverpul luhej për prestigj, por me italianët ende në garë, kurse kryedueli për vend të dytë luhej mes Portos e Atletikos së Madridit. Për Milanin shënoi Tomori në minutën e 29-të, duke ngjallur shpresë për një vend në 6-she të Champions, por Mohamed Salah ua prishi planet me golin e tij në minutën e 36-të. Në pjesën e dytë anglezët përmbysën me Orixhin. Ëndrrat e Milanit për kualifikim u shuan dhe italianët e mbyllin në vend të fundit. Atletiko fitoi bindshëm ndaj Portos në transfertë 0-3 dhe kapi vendin e dytë, pra kualifikohet, kurse portugezët do të luajnë në Europa League si vend i tretë. Në grupin C nuk kishte dilema për të zgjidhur, pasi Ajaksi dhe Sportingu e kishin siguruar kalimin e grupit. Dortmundi si vend i tretë do të luajë në Europa League, kurse Beshiktashi e mbylli me rekord negativ, me 0 pikë. Në grupin D luhej mbrëmë një klasike e futbollit, midis Realit të Madridit dhe Interit. Luhej për prestigj, pasi të dyja skuadrat e kishin siguruar kualifikimin. Fitoi Reali 2-0. Në Europa League, si vend i tretë, do të shkojë Sherif Tiraspoli, një arritje historike e moldavëve. Tabela sqaron më mire pozitat e skuadrave në 4 grupet e para.