Myrto Uzuni, në top-5 lojtarët më efikasë aktualisht në Europë

Myrto Uzuni ëstë futbollisti më në formë i përfaqësueses së Shqipërisë në këtë moment. Ai ka bërë një progres mjaft cilësor me ekipin e Granadës, ku ndihet lider i saj dhe është praktikisht golashënuesi më i mirë i ekipit e njëherësh edhe golashënuesi më i mirë i Ligës së dytë spanjolle (Segunda Divizion). Uzuni është sulmues krahu, por këtë sezon ka qenë përcaktues në vijën e parë të ekipit spanjoll dhe statistikat e golave që disponon e rendisin ndër më të mirët në Europë në këtë moment, sidomos krahasar me statistikën që ka të bëjë me numrin e golave për ndeshje. Jo vetëm kaq, por Granada është e varur prej golave dhe lojës së tij dhe kjo i jep më shumë rëndësi si lider lojtarit shqiptar. Mbetet të shihet performanca e tij deri në fund të sezonit, por golat e shumtë, cilësia e lojës në krahë dhe në tërësi roli prej lideri i tij tek Granada, dëshmojnë një futbollist në rritje dhe me shumë përkushtim, krahas talentit që ai e zotëron. Kjo është shenjë e mirë edhe për përfaqësuesen, ku në duelin ndaj Polonisë pritet të jetë lider i grupit.

Statistikat me Granadën dhe renditja europiane

“Futbollisti i përfaqësueses së Shqipërisë Myrto Uzuni është duke e kaluar sezonin më të mirë të karrierës. Sulmuesi shqiptar po shkëlqen në futbollin spanjoll. Përfaqësuesi shqiptar i ka realizuar plot 20 gola me fanellën e Granadës deri tani në sezonin 2022/23”, shkruajnë mediumet sportive spanjolle, të cilëve u referohen mediat sportive në Shqipëri dhe në Kosovë. Kjo ka bërë që ky ekip të ketë renditje mjaft të mirë në ligën e dytë spanjolle. E beratasi me këtë rast e sheh veten duke i rivalizuar yjet e futbollit evropian. Numrat e tij nuk janë fort larg atyre të yjeve si Haland, Mbape, Levandovski apo Osimhen, përkundër faktit se bën pjesë në një nivel më të ulët garash. 27-vjeçari e ka një statistikë prej 0.63 goli për ndeshje dhe me këtë rast e lë prapa sulmuesin e Barcelonës, i cili e ka mesataren prej 0.6 goli për ndeshje. E më së miri në Evropë qëndron sulmuesi i Mançester Sitit, i cili e ka një mesatare të frikshme prej 1.04 goli për ndeshje. Kuptohet, Haland është nga tjetër “planet”, por edhe ecuria e futbollistit shqiptar të Granadës ka qenë e shkëlqyer e mjaft premtuese për vazhdimësinë e karrierës së tij në Spanjë ose jashtë saj.

Kombëtarja

Kombëtarja është grumbulluar dhe pjesë e listës së përfaqësueses është edhe sulmuesi i krahut, Myrto Uzuni. E pranojnë të gjithë tashmë se në sfidën e radhës ndaj Polonisë, sulmi do të jetë ekskluzivitet i tij në aspektin e pritshmërive, nisur dhe nga nevoja që ka skuadra në vijën e parë. Cikalleshi e ndonjë tjetër kanë rolin e tyre, por në fund të fundit, lojtari më në formë i momentit në sulm është Uzuni dhe të gjithë e dinë këtë, përfshi dhe trajnerin Silvinjo. Ky i fundit po shfrytëzon seancat stërvitore me ekipin për të parë gjendjen e grupit dhe për të seleksionuar 11-shen titullare që mund të marrë maksimumin në fushë. Në kushtet kur në repartin ofensiv ka mangësira dhe pak cilësi, përzgjedhja e Uzunit në pozitën kyçe mund të ndihmonte të arrihej objektivi i skuadrës për duelin e radhës, atë ndaj Polonisë më 27 mars, në Varshavë.