Ndahet nga jeta ikona e futbollit elbasanas, ish-portieri Gogunja

U nda dje nga jeta, pas një beteje me një sëmundje të rëndë, Bujar Gogunja. Ai ishte portier i Elbasanit në kohën e artë të kësaj skuadre, pra në vitet 80-të. Në reagimin e tij, kreu i FSHF-së Armand Duka thekson se Gogunja ishte një njeriu i mençur e fjalëpak. “Të dashur miq të familjes sonë të madhe të futbollit. Pak minuta më parë mora lajmin e trishtë se miku im i mirë Bujar Gogunja, portieri i madh i Elbasanit të viteve ‘80-të, njeriu i mençur e fjalëpak, u nda nga jeta pas një beteje me një sëmundje të rëndë. Ish-portieri i Labinotit kampion të sezonit 1983-1984 ishte pjesë e atij brezi të artë të futbollit elbasanas që sollën emocione të mëdha në gjithë futbollin shqiptar. Bujari, ishte një ikonë e portës dhe do të kujtohet gjithmonë për rekordin e tij prej 1037 minutash pa pësuar gol. Ai mbeti një frymëzim për brezat e rinj dhe kontribuoi për qytetin e tij edhe si trajner portierësh te Elbasani kampion i sezonit 2005-2006. Në këtë moment të vështirë për familjen dhe miqtë e tij të shumtë, gjej rastin t’i shpreh ngushëllimet e mija më të ndjera për humbjen e njeriut të tyre më të dashur. Kujtimet që na ka lënë, do të jenë gjithmonë të paharruara. Prehu në paqe Bujar”, shkruan Duka.