Nga gjoba e tek rënia nga kategoria, çfarë rrezikon Juventus pas 'tërmetit' tek 'Zonja e Vjetër'

Që nga mbrëmja e djeshme, Juventusi është i përfshirë në një kaos të vërtetë, kiu 10 drejtues kanë dhënë dorëheqjen, përfshirë dhe presidentin Andrea Anjelin.

Numri 1 i bardhezinjve dhe 10 personat e tjerë dhanë dorëheqjen pas kontestimeve të shumta që ka pasur Andrea Anjeli nga agjencia “Consob” në lidhje me plusvalencat (rritjes fiktive të vlerës së lojtarëve) si dhe për pagat e futbollistëve në sezonet 2019-2020.

Për këtë arsye personat e përfshirë në hetim kanë vendosur të bëjnë një hap pas dhe të largohen nga klubi.

Por, tani çfarë rrezikon Juventusi?

Nëse nga dokumentet e prokurorisë së Torinos dalin përgjime ose elementë që vërtetojnë shkelje atëherë te “Zonja e Vjetër” do të ketë pasoja dhe mund të shkojë në Gjykatën Federale.

Nga gjoba te zbritja e pikëve te rënia nga kategoria dhe rënia në kategoritë inferiore janë rreziqet nëse faktohen falsifikimi i dokumenteve të kontabilitetit apo administrative ose të ndonjë aktiviteti tjetër të paligjshëm të Juventusit.

E njëjta gjë pritet të ndodhë edhe me çështjen e pagave.