Një serb në krye të Skënderbeut, Takaj i beson Gvozdenoviçit

Skënderbeu ka bërë ndryshime në pankinë. Pas largimit të trajnerit Migen Memelli, klubi korçar ka sjellë një njohje të vjetër. Bëhet fjalë për mbrojtësin Ivan Gvozdenoviç, i cili jo vetëm ka përvojë si lojtar në Shqipëri, por ka qenë edhe në funksione të stafit teknik në Tiranë dhe në Kukës, pra ai e njeh mentalitetin dhe njëherësh organizimin e futbollit shqiptar. Për këtë arsye, goditja e Skënderbeut në pankinë, duke afruar Gvozdenoviç, është një sinjal që klubi dëshiron të rikthehet me ambicie të reja, së pari me objektiv për t’u rikthyer në superligë.

Gvozdenoviç, njohje e vjetër e Takajt

Serbi Ivan Gvozdenoviç ka marrë drejtimin e skuadrës së Skënderbeut! Lajmin në fjalë e ka bërë publik vetë klubi korçar në një postim në rrjetet sociale. Skënderbeu thekson se Gvozdenoviç rikthehet në Korçë, por tashmë në rolin e trajnerit. “Ivan Gvozdenoviç, zyrtarisht bardhekuq. Presidenti Ardjan Takaj ka prezantuar sot teknikun e ri bardhekuq. Fillimisht Presidenti bardhekuq ka falënderuar ish trajneri Migen Memelli për punën e zhvilluar në klub dhe me pas vijoi me prezantimin e trajnerit të ri. Në fjalën e tij trajneri Ivan Gvozdenoviç është shprehur i lumtur që rikthehet në Korçë, tashmë ne rolin e trajnerit. ‘Jam i lumtur që ndodhem këtu, Korça është e ftohtë, por jam ndjerë ngrohtë sapo kam shkelur në stadium. Skënderbeu është një klub i madh dhe ne na takon të rikthejmë klubin sërish në nivelet e mëparshme. E njoh grupin, kemi kualitete por duhet të punojmë me anën psikologjike dhe mentalitetin e lojtarëve. Ne jemi Skënderbeu, si në ndeshjet në shtëpi por edhe jashtë do të shkojmë vetëm për fitore’, u shpreh trajneri bardhekuq. Mirë se vjen Ivan!”, shkruhet në postimin e Skënderbeut. Duket qartë se rikthimi i Gvozdenoviçit ka ngjallur interes dhe duhet që ky optimizëm të japë frytet e duhura, në të kundërt sezoni mund të shkojë në dështim.

Objektivi i klubit

Skënderbeu ra një sezon më parë nga Superiorja dhe tani gjendet në Kategorinë e Parë, por pa shumë pretendime, pasi starti i sezonit ka qenë i dobët dhe skuadra korçare ndodhet larg pretendentëve që janë Flamurtari e Dinamo, apo dhe Korabi e Besa e Kavajës. Por Skënderbeu ka një emër të mirë, një presidencë që nuk e ka braktisur, si dhe një klub të organizuar e me strategji të mirëfilltë në treg. Skënderbeu synon të rikthehet në elitë por këtë edicion duket e vështirë. Megjithatë, klubi nuk ka hequr dorë nga objektivat e tij madhore dhe do të tentojë deri në fund ta realizojë këtë, por kjo kërkon sforco si dhe një merkato shumë të fuqishme në janar, për të përmirësuar treguesit. Ardhja e Gvozdenoviçit është bërë me qëllim për të ndryshuar gjendjen, e cila nën trajnerin Memelli pati menaxhim të mirë, por jo me rezultate maksimale. Pra stafi bëri ndryshime për të larguar krizën e lojës e të rezultateve dhe për t’i dhënë grupit një frymëmarrje të re. Tekniku serb e njeh ambientin sepse ka luajtur me korçarët, ndaj është një lëvizje që ngjall interes. Padyshim që tekniku serb është profesionist dhe do të aplikojë metodat e tij për ta gjallëruar lojën e ekipit.