Partizani 270 minuta larg Conference League, “demat” të motivuar për ta ruajtur vendin e tretë

Java e 34-t e Kategorisë Superiore do të dhurojë emocione të shumta sepse do t’i jepet drejtim në mënyrë përfundimtare edhe zonës europiane në renditje. Në fakt gara për një vend në Conference League ka shumë gjasa të përcaktohet javën e fundit, pra 270 minuta larg, por nëse Partizani fiton këtë fundjavë dhe Vllaznia humbet, atëherë mund të thuhet se të kuqtë do të jenë me siguri absolute në Europë sezonin e ri. Në fakt, Partizani përballë Egnatias për të harruar humbjen e hidhur në derbin dhe për të siguruar fitoren, aq shumë të nevojshme për objektivin Europë. Në kuadër të përballjes së radhës me Egnatian, foli trajneri Dritan Mehmeti. “Është pak e vështirë pas humbjes në derbi, pasi skuadra i dha mundësi kundërshtarit. Tirana përfitoi nga gabimet tona dhe kualitetet që ka. Ishim pak më lart në interpretimin e derbit, por të shohim përpara. Kemi një ndeshje të rëndësishme. Të fokusohemi te ndeshja e radhës për të arritur objektivin minimal.

Gjendja e ekipit në prag të ndeshjes së radhës

Trajneri Dritan Mehmeti foli në konferencën për shtyp për gjendjen e ekipit të tij, por edhe për nivelin e kundërshtarit, i cili mund të hapë probleme. “Egnatia ka elementë shumë cilësorë. Na vunë në vështirësi në barazimin e fundit. Do mundohemi të bëjmë maksimumin, të përqendrohemi dhe të vlerësojmë kundërshtarin. Të futemi në ritmin e duhur, të harrojmë çfarë kemi bërë përpara. Më shumë kam punuar në aspektin ofensiv dhe në tranzicionin negativ. Dy golat e pësuar nga Tirana erdhën nga gabimet tona. Kundërshtari mori iniciativën dhe na goditi. Jam përqendruar që skuadra të jetë e fokusuar te vetja. Duhet të ishim shumë më konkretë, por skuadra ka qenë në rritje, edhe pse në disa ndeshje jemi penalizuar nga situata të veçanta dhe gabime individuale, flas sa i përket rezultateve. Në lidhje me ritmin e lojës kemi qenë mirë. E kemi në dorë fatin tonë, ta kërkojmë gjithçka te vetja. Marku ka pasur shumë ngarkesë, pasi ka luajtur dhe me Shqipërinë U21. Nga janari ka merita gjithë stafi, kemi punuar mirë sa i përket dëmtimeve. Një skuadër që ka shumë dëmtime, do të thotë që trajningu nuk është bërë në mënyrën e duhur. Gjithmonë jam fokusuar që ta imponojmë ne ritmin e ndeshjes, e kërkon bluza e Partizanit. Kundërshtari nuk do të rrijë mbrapa, sepse ka cilësi të mira në elementet që mbart në skuadër”, shtoi Mehmeti.

Arbitrat dhe penalizimi nga Disiplina

Në fund tekniku i Partizanit flet për rolin e gjyqtarëve në derbin me Tiranën, por edhe penalizimin e klubit nga Disiplina. “S’jam marrë asnjëherë me arbitrat, por ndoshta do të ishte më e drejtë të ishim aty ku duhet sa i përket vendimeve. Është hera e parë që ankohem për arbitrat. Kur kemi dy penallti flagrante në derbi, sigurisht që do flas. Disiplina? Më vjen keq, sepse e kemi të pamundur t’ia dalim pa tifozët tanë, që janë ndër tifozët më të zjarrtë në Shqipëri. Nuk e meritojmë këtë dënim”, përfundoi Mehmeti.