Përplasja Nejmar-Mbape shqetëson Paris SG, Ramos bën ndërmjetësin për të qetësuar gjakrat

Paris San Zhermen është një klub i madh, jo vetëm në financa, por edhe në kontigjentin e lojtarëve që disponon. Klubi kampion i Francës ka në mesin e tij disa prej lojtarëve më të mirë të planetit, përfshi dhe ionën Lionel Mesi. Por të kesh “yjet” në skuadër ka edhe dobësitë e veta dhe një prej tyre është se “yjet” me njëri-tjetrin nuk shkojnë dhe aq mirë, pasi kanë frikën e eklipsimit. Kështu, marrëdhënia e dyshes Nejmar-Mbape vazhdon të jetë problemi kryesor për klubin e Paris San Zhermen, me dy sulmuesit që e treguan hapur antipatinë ndaj njëri-tjetrit edhe në ndeshjen e fundit, atë ndaj Montpelier, të cilën parizenët e fituan me rezultati 5-1. Dy lojtarët shkëmbyen disa fjalë dhe u panë duke mbajtur qëndrim. Një nga anëtarët e klubit që ndërhyri në këtë problem ishte Serxhio Ramos. Sipas “Le Parisien”, spanjolli, i cili gradualisht po rimerr formën e tij pas një viti të parë në Paris për t’u harruar, u bë ndërmjetës mes të dyve të shtunën në dhomat e zhveshjes pas fitores ndaj Montpeljesë, në përpjekje për të qetësuar ujërat pas një nate mjaft intensive në “Parc des Princes”. Marrëdhënia mes Mbape dhe Nejmar sa vjen e përkeqësohet. Francezi madje kërkoi largimin e brazilianit këtë verë dhe klubi e mori në konsideratë fjalën e Mbape, ndonëse diçka e tillë nuk u finalizua dot. Të dielën e ardhshme, kundër Lilës, do të shihet nëse Ramos dhe pjesa tjetër e PSG-së ia kanë dalë të qetësojnë gjakrat mes Nejmar dhe Mbape. Mbetet të shihet se sa do të vazhdojë y tension dhe a do të ëprsëriten skenat e sezonit të shkuar, ku dy lojtarët kishin thumbime në media, por edhe përplasje të fshehta e shpesh edhe sy më sy me njëri-tjetrin për lojën dhe sjelljet në fushë. ata nuk e durojnë dot pritagonizmin e njëri-tjetrit. Ndërkohë, merkato për klubin kampion të Francës vijon të prodhojë çdo ditë surpriza, pasi krahas afrimeve të lojtarëve cilësorë klubit të PSG-së i del detyrë të largojë “të tepërtit”. Qendërmbrojtësi Thilo Kehrer do ta vazhdojë karrierën në Premier League. “FootMercato” ka raportuar të martën se gjermani do të transferohet te skuadra e Uest Hem Junajtid. Bëhet e ditur se Ëest Hami tashmë ka arritur marrëveshje me Paris San Zhermen për shërbimet e tij. Kehrer do t’i bashkohet ekipit nga Londra për 20 milionë euro dhe do të firmosë kontratë deri në vitin 2026 pasi t’i kryejë kontrollimet mjekësore gjatë ditëve në vazhdim. 25-vjeçari me Parisin kishte kontratë deri vitin e ardhshëm, ndërsa kampionit të Francës iu pat bashkuar në vitin 2018 nga Shalke për 37 milionë euro.